黃日華再拍劇首要有人照
早前黃日華指無綫對其有份主演的劇集《刑警》待遇不公引起軒然大波，雖然無綫依舊未有為《刑》劇舉行集體看大結局的宣傳活動，但前晚黃日華出席劇組飯聚時顯然已見收火，並坦言心郁再返無綫拍劇！
一班《刑》劇的演員如苗僑偉（三哥）、黃日華、宣萱、胡定欣、王浩信、梁烈唯與監製唐基明等於前晚到佐敦飯聚，並一同收看劇集。
與老婆梁潔華一同到場的黃日華心情甚佳，全程笑笑口，即使記者問到無綫未有為《刑》劇的結局作宣傳活動時，他說：「我都有就呢樣嘢同梁家樹（戲劇製作總監）傾過，佢解釋如果星期五播大結局，公司就唔會咁樣搞宣傳。（接受解釋？）接受，咁大公司係有制度嘅。」
最緊要打燈出色
黃日華又坦承無綫曾邀他擔任頒獎禮嘉賓：「係邀請過我，但我覺得身份尷尬，同三哥商量過後決定唔出席。」問他會否再回無綫拍劇？黃日華卻坦言心郁郁：「以前我一定話唔會，但今次同成班演員合作得好好，好玩又有心，都心郁郁o架！（傾好晒有宣傳先拍？）咁呢啲好難講嘅，制度嚟嘅，最緊要有好劇本同燈光，好燈光後生十年！」
唔理梁家樹解釋
至於三哥對於無綫未有設結局宴一事，他只謂：「無綫唔搞咪我哋自己搞囉。（梁家樹有解釋？）係呀係呀，可能係呀，我冇去了解，隨緣啦。（唔公平？）冇所謂啦，佢哋係《義海》我哋係《刑警》。」
文：影視組