何韻詩明目張膽唱好斷背情
天生豪邁的何韻詩出道至今，與她傳緋聞大部分都是女性，加上喜歡作中性打扮，即被標籤為同性戀者。我行我素的阿詩從沒理世俗眼光，還大唱斷背歌，她更說：「愛係冇性別界定，最緊要忠於自己感覺。」
「若有一天公開明目張膽的愛，我怕會讓你太意外」節錄於何韻詩歌曲《明目張膽》。出道十年的阿詩，只得一個緋聞男友劉浩龍，接住先後與好友傅穎及容祖兒傳斷背。對於「同性戀」三個字，阿詩說：「到依家都驚畀人話係同性戀，咁我唔應該生存喺呢個圈，依家咩年代？大家點解要知得咁清楚？講真邊個可以咁肯定下一個伴侶係邊個？鍾意就鍾意，愛係冇性別界定同唔能夠捉摸，愛係呃唔到自己，最緊要忠於自己感覺，唔需要理人哋點去睇自己。」
與祖兒最交心
阿詩承認圈中最交心的朋友是祖兒，經常互相鼓勵及傾心事：「好難得大家認識超過十年，佢係我可以將所有嘢同佢分享，當大家遇到困難會互相開解。（有冇傾到喊？）有，掉轉佢唔開心都會講到喊，始終我哋職業好大壓力，搵朋友發洩都係好正常。」提到唯一一位緋聞男友劉浩龍時，阿詩以「家人」來形容與對方的關係。她說：「佢同我父母都好好傾，依家大家仲要同一公司，雖然唔係成日會見，但大家都好關心大家，呢啲叫在心中。」
為搏殺唔結婚
雖然阿詩想結婚生仔，奈何現時是搏殺期。她說：「喺呢個時間點生？唔通大住個肚做嘢？順其自然，生唔到咪領養囉。（父母接受？）等自己大啲、有時間同能力先去諗，親唔親生都唔緊要，係為一個小朋友建立開心人生，由細培育佢大。」
文：音樂組 攝：吳文聰
化妝：Arris Law
髮型：Heibie Mok@Hair Culture