李卓庭靠家人接濟再衝事業
李卓庭（Eunix）○七年出道，揮低同年一眾女新人勇奪「生力軍女歌手」金獎，可惜之後事業停滯不前。Eunix承認去年坐足一年「冷板櫈」，為了生計一度想放棄歌唱回歸OL生活，幸獲公司及家人支持才打消念頭。
Eunix以「辛苦」來形容過去四年在樂壇生涯，亦做足心理準備被淘汰。她說：「上年真係有問過自己，不如走啦，睇唔到自己前面條路，成年坐喺度唔係辦法。（諗住做咩？）做番一個普通人，打番份OL工囉，真係冇問題。（最後點解改變？）公司同屋企人不斷鼓勵我。」Eunix坦言市道愈來愈差，當一個半紅不黑的歌手很難立足。
有信仰不寂寞
去年收入不多的Eunix，大方承認主要靠家人接濟。她說：「問屋企人借，有時會諗自己都咁大個女，畀唔到錢屋企仲要問佢哋攞。」提到辛酸史時，Eunix強忍淚水地說：「真係要多謝媽咪，佢話只要我舒服就可以，成日問我夠唔夠錢使。」
Eunix承認信仰對她非常重要：「有好多兄弟姊妹分享，唔會有寂寞時候，同埋令自己多番啲信心。」坐足一年「冷板櫈」的Eunix即將推出新專輯，她說：「錄呢隻碟用咗好多時間，每次錄音就病，加上監製要求好高，雖然辛苦，但真係好開心，因為我真係好鍾意唱歌。」
文：音樂組 攝：劉智源
髮型：Elvis Yau@Hip Hair Culture