陳茵媺偷師恨做毛範
○九年摘下「飛躍進步女藝員」獎的陳茵媺（Aimee），目標未有直指「最佳女主角」或「女配角」，而是能像偶像毛舜筠一樣，做戲做得像個活生生的人。
近年陳茵媺一劇接一劇，問到過去一年有否在獎項壓力下工作，她說：「我心態冇變，都係想愈做愈進步，試多啲唔同嘅角色，例如精神病患者或者奸角咁，個獎冇畀壓力我，我視為觀眾、公司畀嘅鼓勵與認同，更加畀心機向目標進發。」
追求進步
成功飛躍，Aimee的短期目標可會是「最佳女配角」，而終極目標是「最佳女主角」？Aimee聞言笑得更燦爛：「如果有機會攞梗係開心啦！因為係再進一步嘅鼓勵、認同，但我目標唔係攞獎，係演技上進步，我希望觀眾睇唔同嘅陳茵媺，好想好似我偶像毛舜筠咁，揮灑自如，演戲時感覺係個活生生嘅人。」
融入生活
在外國返港發展的Aimee，廣東話不純正可能令發揮被局限，但她反而另有見解：「做戲最緊要自然，太刻意練好對白反而冇咁自然，毛姐都話我發音係準確，唔需要成日諗住發音，佢又教我融入生活，畀咗好多啟發，係我嘅好老師。仲有司棋姐，喺佢身上學到要做好細微嘅嘢，喺佢哋身上偷唔少師，唔止做小偷，係大賊，偷咗好多嘢！」
文：影視組
攝：秦健輝 服裝：GUESS