周迅耍棍上癮武表情
影后周迅首次接拍武打電影打出癮來，笑言雖然打到腰痠背痛，但覺得很有趣，還大爆親自向李連杰請教拍武打片的秘訣，得到對方指點。
周迅前晚專程來港一天，出席於香港醫學博物館舉行的高級時裝店JOYCE 40周年派對兼回顧展覽酒會，到場的名人明星有楊千嬅、麥浚龍、徐濠縈、黃偉文、萬寶寶、葉蒨文、張天愛及化妝師阿Zing等，星光熠熠！
想打得表情靚
身穿Lanvin的周迅說急回北京因要拍攝徐克執導的電影《龍門飛甲》，由於是武打片，拍時感到辛苦，她說：「之前未有拍過打戲，係一個新經驗。（有冇受傷？）冇，但就腰痠背痛，打完起唔到身，預計農曆新年前拍完，所以聖誕節應該冇得休息。（會再接拍打戲？）雖然辛苦，但有趣，今次拍槍同棍，覺得幾好玩，之前所有演員都要上堂一個月作特訓，包括體能同武器認識，如果下次有機會都會再拍。」同片的演員還有李連杰、桂綸鎂與陳坤等，周迅更大爆向李連杰請教：「我請教佢秘訣，問點控制面部表情？因為拍打戲一郁，個表情會好怪，佢話面部表情最重要唔係美，而是要配合招數。」
千嬅冷對賣婚
千嬅則穿上Givenchy連身裙配Alexander McQueen高跟鞋，對有報道指她為與容祖兒爭獎將婚禮轉播權賣給無綫換獎？她聽罷冷笑說：「咁得人驚？嗰個係private area喎！我冇聽過婚禮可以賣畀TＶＢ。（萬梓良當年結婚都畀無綫轉播？）可能當年我太細，知我性格嘅人都知我唔會咁做，總之一定唔會發生。（無綫有冇同你傾過？）一定冇，好無聊。」是否心態有變不恨攞獎？千嬅說：「冇成交唔代表屋價跌，正如攞唔攞獎唔代表人嘅失敗，我努力保持優質樓、呎價高，當然有獎攞開心，正如係骨膠原，對女人重要。如果我唔去頒獎禮又以為我退休呀！」她又說已發帖給黎明，婚期日近開始緊張。
文：名人組