歐倩怡顯食力 安仔做兔爸
恭喜郭晉安又做老竇！自老婆歐倩怡誕下郭家大公子令山後，經過兩年努力，安仔終如願以償，宣布老婆懷孕兩個月。佗着BB的歐倩怡昨日照常湊仔放學，捧着微隆的腹部大無畏表示不怕BB小器。再加上黃浩然和曹永廉相繼報喜，無綫男藝員腳頭勁旺。
為了給兒子添個伴，郭晉安與歐倩怡一直努力造人，精誠所至，安仔終於昨日宣布有喜，在兔年榮升第二任老竇。
懷孕兩個多月的歐倩怡，未有刻意休養，生活如常。昨午四時，略見發福的歐倩怡孖住母親現身九龍法國醫院，然後進入一家Cafe歎下午茶。現場所見，歐倩怡身穿黃色鬆身衞衣腳踏波鞋，腹部微隆，精神不俗。為了護肚，她不時雙手插入腹部袋口，一副幸福媽咪的模樣。
大仔疑呷醋扭抱
歐倩怡懷孕後胃口大增，在Cafe內大啖吃三文治，不消十分鐘已吃光，為了胎兒健康，她選擇果汁之類的健康飲品。祭好五臟廟後，歐倩怡偕母親走到附近的幼稚園，準備湊仔放學，當令山見到媽咪時，未知是否知道細佬妹即將出世大發醋意，不時扭着媽咪要求抱抱。
當記者上前恭喜她時，歐倩怡也不怕BB小器，直認懷孕兩個多月，她笑着說：「唔係有心講嘅，不過大家咁關心我哋先講，加上我哋信基督教，唔會迷信，小朋友喺肚裏發育成長，神自有安排，所以唔介意講出嚟。」
問是否早有計劃添丁？她說：「生多一個好啲，知小朋友成長希望有個伴，我哋老咗都希望個仔負擔冇咁重。」對於生仔或女，歐倩怡並沒所謂，不過生女就可以為囡囡扮靚，並表示生兩個已經夠晒數。
轉口味豉油撈飯
另一方面，郭晉安昨接受查小欣電台節目訪問時，親證榮升第二任爸爸。他表示太太檢查當日，因為有工作在身故沒相陪，當得知喜訊後，他即興奮若狂。他又透露歐倩怡佗這胎十分辛苦，不時嘔吐大作，像校了鬧鐘定時定候。他又說：「依家未知預產期，都會陪太太坐月，盡量爭取呢個月唔使返大陸拍劇，留喺佢身邊。」郭晉安又踢爆太太自懷孕後，口味也改變，竟夜半要求食豉油撈飯，令他笑不攏嘴。文：專案組