Kay患恐懼症見尖就暈
謝安琪（Kay）昨日現身apm商場出席「apm戀戀聖誕之旅 x Kay第2個家簽唱會」，獲大批fans到場支持，場面熱鬧。大會安排兩名小女孩上台與Kay合照，令她即時母性大發攬實小朋友。台上拿起兩支大冷針的Kay，自稱原來一直患有「尖端恐懼症」，對尖銳的物體產生異常恐懼，甚至頭暈，故未試過織溫暖牌給老公。
未打算追多個女
不過Kay自爆張繼聰收好多溫暖牌，部分是其fans所送，問到是否其舊愛送？她說：「我唔係一個記仇嘅人，英雄莫問出處。（真係怕尖嘢？）係呀，我身邊有幾個朋友都有呢個病，如果有人用手指指住我眉心好易暈，軒仔（張敬軒）試過指住我都見暈，最經典係我去咗一間家品店，入面有好多尖端物體，我即刻暈咗。」問到她剛才對小女孩愛心爆棚，有否打算追多個，她說：「未有咁叻追多個小朋友，好多嘢要plan，（囝囝有冇話要妹妹？）佢話唔想要細佬，唔想要妹妹，但想要BB。（老公呢？）冇乜特別，我本身係獨女，覺得一個都有着數，乜都畀晒自己。」
聖誕節留港侍母
明天將到北京宣傳新碟的Kay，表示最近因受訪太多導致有點沙聲，幸而沒有影響唱歌，她說：「好彩我唱歌用丹田，等我試下做訪問都用丹田。」而聖誕節她將留港度過，由於母親在聖誕節生日，Kay準備在家中炮製大餐兼開生日會。
文：專案組 攝：林蔚恩