深情對話：伊健娶YoYo：負番啲責任

上個月老友陳小春結婚，伊健擔任伴郎，婚宴上全力為新郎護航，雖然是補擺喜酒，但各種儀式都重演一次，看到好兄弟簽紙一刻，伊健幾乎感動得哭出來。

鄭：鄭伊健 記：記者

鄭：我要澄清，我唔係伴郎！當日其實只有兄弟姊妹團，由始至終都冇講有伴娘同伴郎。我咁大個仔，好少參與朋友婚禮，更何況籌備？今次係人生第一次做兄弟。其實我最開心唔單止係佢娶老婆，而係見到佢哋兩父子關係變好。小春平時講嘢「鬼食泥」咁，竟然可以講出一番咁感人嘅說話，我都幾乎喊，不過梗係死撐！

與YoYo步伐一致

記：小春結婚會引起你結婚衝動嗎？

鄭：結婚係人生大事，絕對唔會因為見到小春結婚，我又去結，柴娃娃，玩咩？但我承認係有諗，心裏面有呢個plan，但未有時間表。

記：外界感覺你好抗拒結婚，可能因為有傳聞你啲前度女友，個個都因為逼婚不遂而分手。係咩令你態度軟化？年紀？環境？還是女朋友蒙嘉慧（YoYo）？

鄭：我諗係心態，當然，另一半好緊要。其實我唔係抗拒結婚，只係timing同對手嘅問題。呢件事（結婚）係需要嘅，人哋同你一齊咁耐，係要負番啲責任啩！每次拍拖，我都會將集中力放喺「現在」，唔係話冇將來，只係眼見好多人拍拖為咗「將來」，計劃太多，over咗，唔識得享受「現在」，結果兩個人分歧愈嚟愈大。我哋（與YoYo）可能各自見到別人嘅失敗，學識好好享受「現在」，所以我哋步伐都幾一致。

伊健早已有結婚計劃，且看YoYo何時做鄭太？（資料圖片）

陳小春早前結婚，伊健第一次做兄弟。

「退休唔到我諗」

記：父母有冇催婚？你今年已經43歲，會唔會趕上生仔尾班車？

鄭：哈哈，我哥哥已經結咗婚亦生埋BB，有人頂住，壓力已經解除。妹妹都結咗婚，佢哋唔生BB，我都冇諗住生。其實我父母性格好隨和，從來都冇畀壓力，我可以有自己諗法。我好享受同父母、哥哥、細妹相處嘅家庭樂，有能力就請父母去多幾次旅行，冇嘅話，一家人簡簡單單食碗白飯都開心。

記：有冇諗過退休？仲要賺幾多錢先至夠？

鄭：都唔到我去諗，做演員好被動，呢個行頭唔使自己減產，自然會有淘汰，我唔係一個鍾意show off嘅演員，唔識得喺導演面前行嚟行去，要等嗰啲鍾意喺窿窿罅罅搵人拍戲嘅導演。好似劉青雲都唔係咁活躍，有適合佢嘅角色，自然有人摷佢出嚟，上天自有安排。

好命王變黑仔健

記：2001年你跌入谷底，形象事業體無完膚，嗰段日子點過？

鄭：當時我以為自己係雙棲動物，冇戲拍咪唱歌囉！點知我做唱片好唔順利，加上合約啦、感情啦，我覺得自己冇得撈，冇人想我做，曾經好困擾。我可以點？冇得強求，我由「好命王」變做「黑仔健」，可以點？無奈！乜都唔搞，但其實工作量係有，只係好唔順，拍戲票房差，做乜都唔掂。又等幾年，期間有諗過再唱歌，但timing唔啱，又擱置！事隔八年，同我合作多年嘅監製陳光榮突然撩起我條筋，我都想唱又有人投資，外間又好似接受咁喎，決定開演唱會，全部都係timing問題。

開騷過癮在籌備

記：去年個唱反應好，所以明年三月食住條水開Part 2？

鄭：舊年嘅演唱會已經係回憶，明年嗰個唔係Part 2，係重新再做一個演唱會。雖然搞Part 2可以賺多啲錢，但係籌備一個全新嘅演唱會，最過癮係埋班、度rundown、綵排、請嘉賓同埋無止境嘅會議，過程得到嘅回憶，絕對唔比上台少。

記：你同唱片公司合約已經結束，唔簽新公司，係咪因為怕遇到「四大」事件，影響曝光？

鄭：其實我同TVB有合約，我可以喺TVB亮相，但因為之前屬SONYBMG，唔可以唱歌表演，但依家自由身，邊度都去得！其實「四大」問題真係要解決，過去一年，大家都睇到呢件事對樂壇嘅衝擊，甚至娛樂圈生態都有好大影響。

明白黃日華心情

記：會唔會返TVB拍劇？之前黃日華因為不滿返TVB拍劇不受重視，非常憤怒！

鄭：我有留意華哥嘅消息，我好明白佢感受，有時候傾你返去嗰個真係好有誠意，但係去到做嘅時候，或會因為「對口人」已經變咗，未必真係可以兌現，的確會令人氣憤。但嬲TVB都冇用，大公司有大公司制度，我只可以話盡量去享受過程，好似拍《隨時候命》係一個難得經歷，我冇擔心過收視或宣傳，因為我已經享受拍攝過程，賺咗！

後記 玩塔羅牌囉囉攣

伊健的小粉絲「塔羅貓」拉衫尾來湊熱鬧，伊健借啲意要求開牌問卜，小粉絲當然答應，可惜牌已開出還未解答，攝影師催促埋位。原本全程chok樣的伊健，因為「心裏心裏有個謎」臉上流露囉囉攣，攝影師無奈放過他。眾目睽睽下，伊健問的當然是明年三月五日及六日紅館舉行的「Beautiful Day 2011演唱會」，答案是：「大成功！」至於愛情嘛，伊健靜靜雞拉埋「塔羅貓」一邊說：「我打電話畀你！」

伊健雄心壯志，明年3月再征紅館。

放大圖片

髮型：John Chung @ Barbieri Privata

化妝：Will Wong

場地：The Nathan Cellar

文：李慧盈

攝：沈建程