王菲驚喜變身衩晒長腿

王菲前晚於上海世博文化中心完成五場上海站巡迴演唱會，獲老公李亞鵬及好姊妹劉嘉玲捧場，雖然有報道指她個唱銷情不理想，但前晚全場爆滿反應熱烈。向來惜字如金的阿菲，貫徹其「少說話」的作風，全晚只講三句「謝謝」，不過不時向觀眾揮手微笑，唱《將愛》時興奮起舞的她險些絆倒，幸好只是有驚無險，最後唱足兩粒鐘完場。

阿菲坐在鳳椅吊上半空，不時向歌迷揮手的她表現神態自若，原來她非常緊張：「我有畏高真係好驚，我算係咁，坐喺空中都同歌迷打咁多次招呼！」服裝方面，前衞的阿菲前晚將戰衣大變奏，設計師TiTi Kwan透露以「搞破壞」為主題，務求讓歌迷有驚喜：「好似有件褸剪到得番一半，出場條白色裙又剪到變透明，女神裝就用手撕到變高衩。」但他直言錫住阿菲，並非要她行性感，而女神裝的衩高至腰部，盡顯其修長靚腿。

對於有指阿菲只得七成入座率的報道，甚至黃牛飛亦銷情慘淡，大會發言人強調門票早在北京站開始前已全爆：「公安仲要求我們刊登正場門票已賣晒嘅聲明，但係每晚都仲捉到二至三百張黃牛假飛，好多人都知道呢件事，根本炒唔起！」

王菲無懼畏高症吊到半空。

王菲上海開騷爆滿，唱足兩粒鐘。

李亞鵬日日打氣

至於有傳阿菲七度來港是治病趕生仔，經理人陳家瑛直言黐線：「有病就唔可以唱得咁好聲！香港都係阿菲屋企，她仲有私務要處理，如果有事又點可以行街？（阿菲想生仔？）佢信佛，生仔會順其自然。」另外，王菲老公李亞鵬自爆息影，陳家瑛即鬼馬謂：「佢齣新戲都未上，呢幾日佢都有嚟打氣，順便傾生意同工作。」她又透露阿菲明年在港的個唱將大唱廣東歌，曲目與造型都會有好大分別。

另外，未知阿菲是否太落力獻唱，她在微博透露自己「嗓子啞特了」。