祥仔失望未破長今紀錄
前晚劇集《巾幗梟雄之義海豪情》大結局圓滿收場，平均收視44點，最高47點，撼贏結局收44點的《公主嫁到》，《義海》多了十幾萬觀眾；而最高收視一幕是劉醒與九姑娘在山頂回憶。至於全劇平均收視計，《公主》有二百一十四萬觀眾，《義海》則是二百一十萬，少四萬觀眾。《義海》監製李添勝讚該劇的二、三線演員，更獲六名觀眾致電無綫讚賞。無綫副行政主席梁乃鵬下周二將請《義海》演員食飯慶功。
「劉醒」黎耀祥對《義海》未能破韓劇《大長今》紀錄而感失望，問可會如他之前承諾將名字倒轉寫？祥仔笑說：「點寫都冇所謂！靈魂人物過咗檔，相信唔會開第三集！」至於寄望甚高的李添勝，對《義海》未能破《大》收視則有點淆底，笑稱不需要「執牛屎」，並說：「唔使執啦！47點已經好滿意！期望梗要set高啲！美中不足係未能返內地取景。」
咪吹毛求疵
問他會否開第三集還願？李添勝說：「唔喇！留畀第二個監製做！唔想霸住！（犯駁位多？）唔好吹毛求疵，岳華唔係真癱，隻腳實會郁，而祥仔支槍開極都有子彈一幕，西片都成日有啦，唔通停低換子彈！（高層請食飯都有獎？到時過咗頒獎禮？）老細啲期要度！總之睇好雯女同祥仔！」