《讓子彈飛》記招重逢 發哥攬嘟姐搔七年之癢

投資近一億五千萬港幣、集發哥、姜文、葛優三大影帝的《讓子彈飛》明年一月公映，昨由發哥揭開香港首個宣傳，即吸引半百傳媒採訪，發嫂陳薈蓮及英皇集團主席楊受成亦有出席，記者會則請來發哥好友鄭裕玲（嘟姐）任司儀。

A貨露背頂替

發哥跟七年沒見面的嘟姐甫見面即上前擁抱，還大讚嘟姐比以前更年輕，氹得嘟姐鬼咁開心。嘟姐以司儀身份跟發哥談及電影拍攝工作，發哥謂另外兩位影帝表現都很好，所以他也要做好準備，努力做好，嘟姐問到他在戲中一人分飾兩個角色，有否遇到麻煩？發哥笑笑說：「佢哋搵咗個『廣州周潤發』嚟做替身，睇背面都好似，我未試過兩個角色，仲要唔同性格，好好玩。」

視帝貼鄭則士

此外，向來愛煲劇的發哥被問到前晚可有收看《巾幗梟雄之義海豪情》大結局？發哥即說：「好睇！（睇好邊個視帝、視后？）鄭則士啦，夠分量，（點睇林峯？）咪似麥包囉！視后就係鄧萃雯、佘詩曼爭，（揀一個呢？）冇得揀，咁揀鄭裕玲啦！」發哥幽默回應，全場爆笑。

除煲劇外，發哥亦有留意黃日華發火鬧無綫，他笑言：「佢鬧TVB睇唔到，我只讚TVB，唔會鬧。」在旁的嘟姐問他會否返無綫拍劇，發哥則謂：「你拍我咪拍囉！但唔知會唔會叫我一年簽一個騷呢？係就唔知點算好。」對於老友發哥支持攞視帝，鄭則士笑道：「多謝佢囉！都冇可能，佢又唔係評審，有咩用先？係就話啫！」

除了發哥嘟姐，發嫂（右二）及楊受成（右）亦有抽空出席。

昨日有半百傳媒到場採訪，場面墟冚。

文：影視組