適逢感恩節五日假期，一眾荷里活名人紅星繼續搵節目度假。當中真人騷女星Kim Kardashian同荷爾芭莉舊愛Gabriel Aubry一星期第二次約會睇戲；尊特拉華達就與師奶們齊齊排隊入百貨公司執平貨。
Kim的母親雖然日前指女兒同Gabriel只是朋友，但繼上周二人一同去睇NBA之後，二人前日又被影到盛裝一同到戲院睇Christina Aguilera主演的新片《Burlesque》，及後更一同燭光晚餐，接着Kim就由Gabriel接載離開，事後Kim在Twitter留言指他們食得太飽。另方面，一向甚懂搵銀的Kardashian姊妹花最近又一同做生招牌拍攝充滿60年代的泳衣廣告，大賣性感。
除了Kim之外，剛宣布再做老竇的尊特拉華達，於感恩節翌日的黑色星期五（即百貨公司大減價日）被影到在佛羅里達州的梅西大百貨公司Shopping。據知肥尊為了掃平貨，好神心與其他人一樣清晨五時在店外排隊，等百貨公司開門，而期間肥尊亦好識做與師奶阿叔合照及簽名。
至於妮歌潔曼就選擇於感恩節正日帶女兒Sunny Rose一同在德州睇美式足球比賽，更順道捧擔任表演嘉賓的老公Keith Urban場。此外，《變形金剛》性感女星美瑾霍絲與老公Brian Austin Green前日以情侶裝打扮到迪士尼世界遊玩，期間更不忘自拍留念。有網友更影到二人到紀念品商店Shopping的情況。而同樣有家室的著名黑人男歌手Diddy就選擇同女兒過感恩節，Diddy與女友Kim Porter更一同扮小丑同女兒一同去派對。
文：外娛組