深情對話：陳法拉：個獎純金就唔同

陳法拉：陳 記者：記

無綫花旦買少見少，05年入行的法拉要肩負的責任就愈來愈重，有人認為她做視后指日可待，但法拉是一個實際的人，有時太早升呢，只是一席甜品盛宴引誘你上斷頭台，打入萬劫不復之地。

記：覺得今年係最接近視后嘅一年？

陳：一啲都唔近，起碼我唔會咁睇，《義海豪情》我唔係女主角，雯女先係擔正，《公主嫁到》都係，只有《蒲松齡》先係女主角！

鍾意頒獎禮氣氛

記：唔想升呢攞獎？

陳：攞唔攞獎真係冇乜所謂，入到套好劇已經得咗，30幾集大劇，觀眾睇足我30幾日已經係大獎賞，攞視后無疑係吸引到關注，但唔係我最終目標。

記：視后始終係無綫最高榮譽喎？

陳：（打趣說）如果個獎係純金就唔同喇，你知依家金價貴到離譜，熔咗佢真係攞番唔少錢！哈哈！反而我更加鍾意頒獎禮個氣氛，可以一次過見晒啲朋友，好似開Party一樣咁熱鬧。

記：是否覺得自己未夠火候？

陳：進步係永無止境，我鍾意不斷學習嘅過程，結果唔太重要，我仲有排學。距離收放自如，我仲爭千億里，依家我只希望脫離花瓶，得到一個演員身份，咁我先可以繼續喺呢行立足。

坦承少少驚雯女

記：今屆視后睇好邊個？

陳：阿佘同雯女我都好鍾意，真係好難揀。其實我同阿佘合作好多次，同佢同場，了解到佢嘅工作態度，明白到做一個演員嘅修養。但我又覺得雯女冧莊好喎，我同佢對手戲唔多，但知道佢角色好沉重，對白又多，喺廠都唔敢騷擾佢。講真，當時真係有少少驚佢！

記：有冇從雯女身上偷師？

陳：原來我嘅感覺係錯，到煞科慶功，雯女再不見沉重一面，反而行過嚟同我、定欣講「香港演員唔夠，香港電視靠晒你哋，大家飲多啲」，我知道佢認同我先會咁講，係入行以來最大嘅鼓勵！

「起碼要生兩三個」

中國二千年來都以儒家思想治國，「不孝有三，無後為大」更深深烙印在國人腦海中。法拉雖然在外國長大，但生兒育女是女性天職，若然有天腹大便便，法拉會選擇事業還是愛情？

記：想結婚生仔嗎？

陳：結婚生仔一定係我必經階段，真係好期待，希望人生可以好幸福，我係一個好簡單嘅人，呢個世界唔會有嘢比家人更親。

記：生小朋友後如何兼顧家庭同事業？

陳：我諗第日起碼會生兩三個，我知道湊小朋友一定要用心同時間，我應該兼顧唔到事業，就算養貓都要take care啦，何況自己骨肉？

五餸一湯好「依時」

記：依家又會點揀？

陳：我又冇小朋友，當然可以兼顧家庭同事業。暫時都冇人逼我，絕對冇衝突，當然生咗小朋友就難啲。

記：聽聞你好鍾意下廚？

陳：係呀，細個媽咪煮嘢食，我一定會幫手，我又鍾意睇食譜，所以家常小菜難我唔到。以前日本留學，我又跟當地家庭學整日本料理，加上成日食西餐偷師，中西日五餸一湯絕對「依時」。

記：會唔會特別多人讚？

陳：我整嘅牛腩真係好多人讚，好多朋友食過都話正，佢哋仲叫我可以開間台灣牛肉麵，一定有生意。

記：會唔會出書講飲食？

陳：我諗唔會喇，煮嘢食只係我興趣，我又唔係有乜大心得，唔想空口講白話呃錢。

後記：手勢媲美大廚級

法拉從不喜歡炫耀自己，尤其是了得的廚藝，掩飾得以為她是一個飯來張口的人。原來實情倒是相反，隨她身邊多年的經理人表示，也嘗過法拉的手勢，大讚媲美大廚級，絕對可以出書。然而，法拉斬釘截鐵不會出烹飪書，這是否另類的「假大空」？

文：霆　攝：吳文聰

服裝及場地：Miss Sixty