不勝工作量 曾三次入院 蒼井空缺席首映禮
麥浚龍與蒼井空主演的電影《復仇者之死》將舉行首映禮，曾三度來港的蒼井空突然缺席！有傳蒼井空十月來港宣傳時，因工作量太大不勝負荷，短短兩日就要三次到醫院求診，苦不堪言。她回日本後即向電影公司詐型，原本在個半月前答允出席首映禮，最終都要缺席收場。
記者就此事致電投資《復》片的852電影公司，發言人表示：「蒼井空上次來港確實做咗好多活動同訪問。（係咪入過三次醫院？）係呀，但佢都堅持到最後，完成晒所有工作先走，我哋都好感謝佢。（係咪畀工作量嚇怕唔嚟香港首映？）我只可以講，佢確實係個半月前應承嚟首映，但佢呢幾日透過經理人公司打嚟話有工作嚟唔到。」
記者就此事再致電麥浚龍，他表示：「我唔知，呢啲係電影公司安排，但上一次確實宣傳得好密。（蒼井空有冇嬲埋你？）冇，上次佢返到日本之後，都有同我報平安。」