老爺獲三男孫 徐子淇鬆晒冇壓力
千億新抱徐子淇昨出席卡地亞酒會時，穿上一襲紅色低胸晚裝，身材明顯較前豐腴，問她是否有喜時，她笑得正甜，笑說尚未有消息：「肥咗係因為天氣凍，成日食打邊爐，要飲好多朱古力奶保暖。」早前其大伯李家傑請代母誕下三胞胎，昨晚子淇首度公開回應此事，她大讚三胞胎有「三好」，好得意，好湊又好健康：「我兩個女成日同佢哋玩，大女自從有咗堂細佬後乖咗好多，好似大家姐咁，（兩個女會唔會妒忌三胞胎？）冇，可能唔係一齊關係，反而生細女時，因為同家姐一齊住，就會妒忌。（大女錫堂細佬多過錫細妹？）唔會，淨係知道要錫佢哋，（大伯未有女友，你畀多啲母愛三胞胎？）一定會，家人梗係錫家人，我帶啲女出街，都會帶埋佢哋。（見到生仔流口水？）見到好想，未見到反而未有諗。」
外界都認為李家傑生三胞胎後，會對徐子淇造成生仔壓力，但她說：「如果冇呢三個BB，我下一個BB會好緊張，因為好想圓老爺心願，大伯有三個仔，幫我鬆咗口氣，生下一個都鬆咗啲，始終生仔生女唔係自己控制到。」她稱大伯得三胞胎是一種緣分、是福氣，但她不會考慮人工受孕，因相信命運天注定，但強調會繼續生育，笑言生多幾個有保險，希望總有一個陪伴她。
李家誠隨後於晚宴會合子淇，亦首度開腔大談胞兄的三胞胎，大讚得意好好玩，亦笑言會努力生男Ｂ，問到會否介紹女友給胞兄時，他一面尷尬，笑言自己不太認識女仔，而子淇在身旁笑說：「我已經係佢最後識嘅女仔。」