鄧芷茵處女碟面世 自信夠靚多人like
每年都有一批樂壇新人湧現，要吸引樂迷注意就必須設法突出自己，鄧芷茵（June）打正旗號以靚聲取勝，雖然近日才推出首張唱片，但她直言能親眼看到自己的BB誕生，就算花了一年心血製作都值得！
June自小熱愛唱歌，曾在多個歌唱比賽得獎，由加拿大回流返港的她今年終於有機會推出首張個人唱片《First Of June》。June早前更親自落唱片舖小試牛刀，播放主打歌《Love Me Hate Me》，再問現場樂迷反應：「好彩大家反應都幾好，呢首歌嘅歌詞其實好表現到我真實嘅性格，同埋呢首歌所有幕後班底包括我都係從加拿大返嚟，所以我哋叫佢做『加拿大之歌』！」
三色反映性格
新碟以黑、紅、灰為主題，分別代表三個不同性格的June，她說：「紅色代表開心活潑，黑色代表我嘅陰暗面，灰色就係中間位，用嚟平衡。」June更試了多個誇張造型拍攝唱片封面，她大呼好玩：「我一向化開比較舒服自然嘅妝，今次有好多造型正常嘅我一定唔會試，好似其中一個妝，我化到對眼、嘴唇都全黑！」
對於年尾的頒獎禮，她直言不會給自己太大壓力，但對於新碟銷量她就充滿信心：「話晒用咗一年時間生呢個『BB』，一定有信心，個個父母都一定覺得自己個係最靚架喇！」
文：專案組
攝：李柏儒
髮型：Lorraine Lam@Hair Culture
化妝：Marsha Ma@江中平@Make Up School
場地：The Moments Cafe