何韻詩聖誕開騷落足料補鑊

何韻詩早前推出的處女國語專輯《無名‧詩》叫好又叫座，阿詩更專程飛到台灣進行三個月密集式宣傳，並舉行多場音樂會，每場人數都超出預算逼爆場地，又曾到北京、上海及深圳等地開騷，令不少本地「詩迷」呷醋，在官網留言發表意見，疼錫歌迷的阿詩甘願放棄搵銀好機會，入紙伊館申請聖誕檔期，皇天不負有心人，最後成功批出十二月廿三至廿五日三日期。

舞台劇紀念十周年

阿詩表示每年都會舉行聖誕派對，她說：「今年好特別，可以叫晒成班朋友上台玩。」阿詩坦言雖然場地不及紅館，但仍揼本製作，她說：「係用紅館製作去做呢件事，我咁挑剔一定唔會差。」聖誕節是歌手登台搵銀機會，阿詩笑笑口說：「我哋為音樂、為理想犧牲好多。」

阿詩為慶祝明年入行十年，將舉行舞台劇，深受老闆愛錫的她感激公司支持，問到有否試過提出要求被拒？她說：「冇，公司盡量滿足自己，我又唔係太過分，不過每次（支出同收入）都係扯平。」隨即笑說：「唔緊要啦，公司仲有好多歌手賺錢。」

放大圖片	走遍內地和台灣宣傳的何韻詩，聖誕檔期留給香港粉絲。

採訪：音樂組　攝影：黎志輝

髮型：Karman Wong@Hip Hair Culture

化妝：ARRIS LAW@Atelier d'AR　場地：The Bali@Nathan Hotel