關心妍為外公做個快活人

Jade自嫁予坐擁三億身家的金融才俊楊長智後，頓成幸福少奶奶，然而幸福背後，早前卻有一段令Jade心碎的經歷，她說：「外公九十幾歲，佢當時已經唔食得，講唔到嘢，又認唔到我，以為我係佢個女或者佢個朋友，我知佢身體好差，但佢要離開，我真係好唔捨得。」

Jade生於單親家庭，自小父母離異，當年因母親要工作，就將小Jade交由外公、外婆照顧，她憶述：「外公好錫我，我同佢感情好深，雖然我十幾歲就去咗加拿大讀書，但大家都有保持書信來往。」回港發展當歌手後，疼錫Jade的外公，每天閱報了解乖孫的近況。

難忘相處點滴

問她和外公最難忘的點滴，她眼濕濕說：「有次我去探外公，當時嘅佢仲認得我，佢睇咗報紙知我唔開心，佢無端端同我講：『得饒人處且饒人呀。』當時我好愕然，原來外公咁關心我，有睇報紙留意我啲新聞。」Jade又說外公是「報紙迷」，是《東方日報》的忠實讀者，她笑言：「外公除睇娛樂版外，仲有睇港聞、副刊，連招聘廣告都唔放過，好好笑。」

她又說收到外公死訊當天，百感交集，因她下午正參加歌手好友可嵐的婚禮，由戥人開心變成傷心痛哭。她又說雖然外公病逝，但相信外公還在遠方天國守候她，故她要活得開心，不想再令外公擔心。

髮型：Coven@hair

化妝：Ah B

服裝：裙：Pramp@Fasherati

皮帶：Norwegian Wood

頸鏈：Fasherati HK

形象指導：Jennifer

場地：il meglio

採訪：音樂組 攝影：秦健輝