高海寧打回圓形證冇加工
早前被指「變臉」的高海寧，近期因拍攝飲食節目而由朝食到晚，面對美食難以忍口的她開懷大吃，尖面又漸漸變圓，實行以暴食行動為「變臉」平反！
港姐出身的高海寧，參選時有副「包包面」，但圓潤面形漸漸變得面尖尖，早前更被指整容。對於被外間懷疑整容，高海寧接受專訪時指對新聞反而感到高興，她說：「自己冇整容，當然唔會因為呢啲新聞唔開心，當係宣傳囉。高興嘅係自己餐餐食麥皮地獄式嘅減肥方式冇白費，同最重嘅時候相比相差廿磅，塊面唔尖都奇怪啦，最開心係條腰同腳都幼咗。」
自認為食
最近忙於為飲食節目《為食一條街》開工的高海寧，因由朝吃到晚之故，尖面有變圓潤之勢，無疑粉碎「變臉」之說，她表示：「自己太鍾意食嘢喇，由朝早九點到夜晚七點開工都不停咁食，同埋我係唔係扮食，我係真係食落肚，有啲特別好味停咗機我都仲食緊，所以啲反應咪話食得好自然囉，導演都暗示過話我塊面圓咗少少喎，其實依家比未做節目前足足肥咗八磅。不過，唔理喇！拍完節目先再減肥。」
整容怕痛
被譽為新一代「咪神」的高海寧被問到若然整容，最希望修葺哪個部位﹖她說：「其實真係冇諗過整容，因為好怕痛，情願做運動減肥。如果一定要揀，希望對腳瘦啲，總係覺得自己對腳唔夠幼。」
採訪：影視組
攝影：攝影組
服裝及場地：Miss sixty