連詩雅掃處女碟興奮如出嫁
樂壇新人連詩雅（Shiga）shopping未試過買到心肝卜卜跳，日前其處女碟正式推出，Shiga完成整天宣傳工作即飛奔唱片舖，買下自己人生第一張唱片，興奮程度還以為自己出嫁。
Shiga期待多時的處女唱片《Moment》終於在「11‧19」面世，首日出碟由朝忙到晚為新碟四處宣傳，至晚上收工Shiga第一時間飛奔到唱片舖，幫襯自己買碟攞好意頭，她衝入唱片舖看到架上放着一張張她的唱片，唱片舖又正播出她的新歌，令Shiga忍不住興奮大叫，更急不及待在架上連掃八張唱片：「要買八隻，『發』好意頭嘛。」隨即跑到櫃台付錢。
喜遇學長
不過，最令Shiga意外的是遇到「fans」，是她讀書時同校的型仔學長，對方特意來買碟支持她，令Shiga感動又開心，即場變成「簽名會」，親手為學長送上簽名。Shiga特別在新碟封面寫滿一大篇感謝說話給父母，回家時即第一時間送給他們，其餘五張將分配給親戚，自己則keep兩張，一張用來聽，一張則作收藏，至於她的朋友，Shiga即抵死笑謂：「係我嘅朋友就應該識做，買碟支持我啦！」
夾定時辰
講到處女出碟心情，Shiga說：「咁大個女以嚟真係最開心係今日，開心到好似嫁咁。（係咪夾定時辰八字出碟？）日子係公司決定，不過，寧可信其有嘛，點都信咗先，又冇蝕底嘅。」