李彩華爆羅霖白袋30萬佣
李彩華（Rain）與羅霖結束三個月經理人關係後，怎料有人不停以受害人身份向傳媒爆料，昨日Rain為討回公道，力指羅霖在任經理人期間，一單工作也接不到，但照袋逾三十多萬元佣金，而二人好友趙雪英亦可做證。
李彩華在八月由前寰宇老闆娘趙雪英拉線下，試用羅霖為經理人三個月，並合資聘用一名助手，十月結束合作關係後，隨即傳出Rain與羅霖合作期間，跳過對方找趙雪英手下搶傾合約，拒付羅霖佣金，令已付逾三十萬元佣金的Rain大為激氣。
「講到係我哋問題」
原本想大事化小的Rain，因近日有人不斷向傳媒形容自己在事件上是受害者，更暗示放料另有其人，昨日Rain終於忍無可忍要討回公道，並說：「羅霖根本一單job都未接過，唔明錢照袋，仲要講到係我哋問題。」
Rain自言當初有人放料她不畀佣，羅霖已承認是助手所為，並叫趙雪英代為向她道歉。她說：「佢做我經理人咁耐，所有嘢都係趙小姐接番嚟，個劇佢冇做過嘢，趙小姐都叫我將十五萬佣金轉贈畀佢，即使趙小組做中介人接番嚟嘅工作，佣金都照歸佢，嗰度都十幾萬，點可以話我唔畀抽佣？」
趙雪英代討回公道
除此之外，經常在內地拍劇的Rain，有次回港出席活動，需要助手陪同前往，羅霖亦因自己需要用助手而拒絕，還叫她自行封利是另請人用。Rain說：「羅霖連日嚟對外界講嘅嘢，全部都唔係事實，好影響我聲譽，原本趙小姐都叫算數，但家陣件事畀人愈描愈黑，趙小姐話可以搵主辦單位出嚟同羅霖對證，我亦會保留法律追究權利。」
趙雪英亦在電話中說：「當日係羅霖親口同我承認係助手放料，本來我叫阿Rain澄清咗就算，始終大家一場朋友，但係依家影響到阿Rain嘅聲譽，我都唔好意思，希望幫阿Rain討回公道。」
文：追蹤組