群星有say要顧尊嚴

梁詠琪：成日過關都會check，好多地方都係咁，最尷尬一次試過一邊安檢，隔籬就有關員用手機影相，不過冇辦法，為咗安全都要接受，搜身係正常程序，好在冇畀人掂過重要部位。

李玟：美國出境嚴啲，因為唔同國籍嘅人太多，自己都試過畀人搜身，但就冇上下摸，不過有次媽咪着咗5、6件衫過關，關員要佢除衫檢查，嗰次媽咪就好嬲，有次家姐唔止要除鞋，關員仲攞支鐵檢查佢隻腳，家姐都覺得唔合理。自己就試過喺夏威夷過關，要攞晒所有液體出嚟檢查，自己大懵攞漏支眼霜sample，畀關員叫番轉頭再排隊。

梁詠琪	基仔將成為亞運會閉幕式表演嘉賓。

鍾舒漫：2月去過美國，過關經過重重障礙，嗰次都有畀人搜身，只係用手拍吓拍吓，冇掂到重要部位，如果有我會大嗌，一定出聲投訴，估唔到依家咁誇張，嚴謹啲唔緊要，但要尊重。

任達華：我早幾個月喺美國返嚟仲未有咁嚴重，但都要除鞋、除皮帶，除剩牛仔褲同恤衫，我覺得安全係重要，安檢一定要但都要顧及人嘅尊嚴，啲政府應該要諗啲辦法出嚟解決，依家咁做唔合乎情理囉。

肥媽：我成日周圍飛去登台，無幾耐之前同陳潔靈、葉麗儀去完美國登台，農曆新年又會去美國，咁耐以嚟又冇試過不禮貌對待，佢哋移民局係大聲啲，人多嘛！但依家有全身X光機，行入去乜都睇晒，唔使話要出手，我哋坐慣飛機，預先唔會着太多金屬嘅衫，錶、鞋乜都要除晒。

李彩華：喺內地發生機會比較多。我每次都放低身上所有金屬品，但部全身X Ray儀器幾乎每次都會響，到我企埋去被人檢查時，佢哋會用金屬探測器和手去檢查，最後又搵唔到原因，好奇怪。（因為你係藝人？）我唔敢咁講。（尷尬？）為咗乘客安全我樂意配合，雖然係由女安檢員負責，但當眾被接觸身上某啲地方係會有尷尬嘅，惟有當人家唔小心，自己諗多咗囉。

周秀娜：我雖然未遇過拍身摸胸，不過美國過境時被要求除鞋，當時我着鞋冇着襪，真係好尷尬！