官恩娜失而復得保住密照

Ella昨日到電台宣傳新歌《一刻感應》，大頭蝦的她甫見記者即慌張說：「死喇，我跌咗電話，入面有好多藝人電話。」問到在哪裏遺失？Ella詳細解釋說：「今朝趕住出嚟，好趕咁喺屋企落停車場攞車，嚟到先知電話唔喺身，即叫助手打畀我啦，個電話仲響，估計喺攞車沿途跌咗，依家叫咗工人落街睇吓搵唔搵到。」

藏有肉麻短訊

問到電話中有否慾照？Ella睜大眼耍手擰頭說：「冇，不過有少少親密照，依家魂魄唔齊，個心卜卜咁跳，好驚。（情慾短訊？）冇，當然有一、兩句好掛住你嘅肉麻嘢。」Ella表示很少唔見手機及銀包，難怪她多次唉聲嘆氣，並肉緊得雙手握拳說：「激死。」問到會否出厚酬尋手機？Ella說：「我要睇多陣先。」

怕畀柏豪追斬

Ella又自爆前日膽粗粗問好友周柏豪取電話號碼，但不夠廿四小時就遺失電話，她笑說：「畀佢知道實追斬我。」而柏豪表示不介意有人打給他，他說：「成日都有匿名電話打畀我，如果真係執到電話個人打嚟，我會說服佢交番電話出嚟。（Ella話你會追斬佢？）我救過佢部電話幾次，佢好大懵o架，成日將電話亂咁擺。」

之後記者聯絡Ella，得知她已尋回手機，她開心得說：「真係好彩，工人喺停車場搵番咋，嚇死我呀。」

採訪：音樂組