劉心悠滴汗跣裙超胸險
劉心悠（Annie）昨日打扮靚靚出席htc手提電話發布會，她在台上介紹電話功能時不慎跣手，電話「霹啪」一聲跌落地，Annie尷尬到不停傻笑，匿埋司儀森美背後，要由森美代為解窘。
Annie昨日身穿藍色連身通花tube dress出現，率先跟兩位模特兒行catwalk展示全新手提電話，期間tube dress不斷下滑，令她胸前的事業線若隱若現，背後更露出肉色bra邊，非常香艷！
匿埋求救
當司儀森美邀請Annie分享用電話的心得時，Annie竟不慎甩手，將電話跌落地，她尷尬得不停傻笑，更匿埋森美背後求救，森美隨即「執生」將電話再掟落地並笑說：「絕對能夠通過跌機測試。」英雄救美贏得不少掌聲！Annie對tube dress下滑有穿崩危險，接受訪問時說：「射燈照住我，個人開始流汗，所以件衫跣落嚟，不過唔擔心嘅，我知佢跣但一定唔會跌。（露bra邊？）really？可能頭先郁動大，跌電話嗰刻真係好尷尬，唔知點解無啦啦會甩手。」
雨過天青
同場的Mr.透露下月20日將會跟MC Jin合作舉行演唱會，對於朱明銳狂轟港台於獎項上面出蠱惑，Dash說：「每個頒獎禮都有自己制度同安排，獎項只係對歌手一種鼓勵，Mr.都係繼續做好音樂。」主音Alan則說早前的桃色糾紛已經解決，毋須再到警署報到：「雨過天青，件事告一段落，多謝大家關心。」
文：音樂組