阿嬌心思思偷返港慶功
鍾欣桐（阿嬌）單飛出EP報捷賣斷市，她興奮坦言密謀「偷渡」返港搞慶功P。踏入聖誕登台高峰期，阿嬌自爆接騷接到手軟，奈何檔期爆滿只好忍痛推卻百萬元出騷錢。
為谷EP阿嬌向內地劇組請假返港，瘋狂出席各式活動造勢，前日在港舉行新碟簽名會後，火速上機飛無錫開工，為爭取最後一秒宣傳機會，結果終有回報，新碟報捷賣斷市。阿嬌昨日興奮地說：「勁開心！昨（前）晚有fans嚟機場送機時『投訴』唱片舖冇得賣，我立即打電話返公司問清楚，原來賣斷市，我喺飛機上開心到拍掌！」她表示最感激內地劇組遷就她一個星期，所以她首先向劇組「萬歲」請飲東西當慶功。至於香港的fans，阿嬌笑說：「呢個劇要拍到明年農曆新年，但我希望可以『偷渡』返港與fans見面，搞個迷你慶功P，答謝大家。」至於好姊妹蔡卓妍昨日生日，阿嬌透露已送上Big Kiss。
冇檔期賺少百萬
雖然阿嬌要拍到明年，但聖誕是登台吸金高峰期，她亦接了不少演出，接近七位數字酬勞袋袋平安，她說：「呢啲商演都係拍劇之前接咗，一定要演出，之後亦有好多大大小小聖誕登台搵我做，可惜要拍劇都接唔到，計計埋埋都有一百萬元！」
文：專案組