(11)權蕙洙施捨(3)萬嘉麗攞季軍
【羅美倫惠州直擊】《2010亞洲小姐競選》昨日移師惠州拍攝泳裝外景，韓國佳麗權蕙洙揚言自己可奪冠軍之餘，更沒放盛傳內定冠軍的萬嘉麗在眼內，她笑言：「既然大家話佢好，可以畀個季軍佢」。
十七位亞姐候選佳麗昨日齊集惠州一間溫泉度假酒店拍攝泳裝外景，雖然天氣轉涼，但各佳麗的三點式泳裝吸引大批男士站在室外圍觀，當中以(2)何婭、(4)祁翼、(5)閔蘭及(11)權蕙洙身材最為「凸」出。圍觀男士邊睇邊拍之餘，當見到有「韓版Jessica C.」之稱、有樣有身材的權蕙洙脫去禦寒浴袍出場時，即傳出連番叫囂聲。
年紀大經驗豐富
權蕙洙透過翻譯表示：「我對自己樣貌同身材都好滿意，我狀態好好，聽到人讚好開心。（你廿七歲會唔會輸蝕？）我年紀大，但身材同樣貌唔輸蝕畀其佳麗。（有傳(3)萬嘉麗係內定冠軍喎！）冇聽過，亦唔會理。（有信心奪冠？）當然！（你同萬嘉麗相差九年喎！）外貌睇唔覺，反而我比其他佳麗有更多人生經驗。（睇好邊個攞冠軍？）自己！亞軍就貼(9)邱淑芬，至於季軍，既然大家話(3)好，咁就畀佢攞！」
對於被傳內定冠軍，萬嘉麗對答得體說：「未聽過，邊個講？（增加信心？）唔會，要睇當晚發揮。唔會信小道消息，講未必會係，會努力做好自己，但我有信心入三甲。（邊個係你勁敵？）個個佳麗都好，要睇臨場發揮同評審意見。」
邱淑芬爛面未愈
同樣被傳內定亞軍的泰國佳麗邱淑芬透過翻譯回應：「唔知有咁嘅傳言，但都開心。（增加信心？）嚟得參選，信心梗有，但要睇表現。（皮膚問題好番未？）喺香港睇咗兩次醫生，食緊藥，好番啲。我係喺泰國食咗啲暗瘡藥搞成咁（爛面），我知道咁會影響評判觀感，但我冇為咁而喊，因為冇人係完美，希望皮膚問題可以快啲改善。」至於被傳內定季軍的(16)何婭萌則因事請假，昨日缺席泳裝外景。
