DaDa海灘封咪：唔慣畀人望
「百果園咪神」陳靜（DaDa）雖然以勁爆上圍見稱，而且每每出席活動時也性感爆燈，但昨日DaDa出席海灘活動時竟密封咪咪，只露纖腰，且表示至今仍未習慣畀人望。
DaDa昨日率領一眾同門師妹，與高海寧、馬賽及歌手鄧紫棋（G.E.M.）等於石澳海灘出席慈善活動，雖然各人也穿上大會所派發的T恤，令DaDa未能於海灘上一展驕人上圍，但她仍非常有心思把T恤D.I.Y.，露出纖腰。
最怕肥肉曝光
問到DaDa是否甚少在海灘上如此密實？她說：「其實近一年嚟海灘都係做嘢多，所以都會好性感，以前就會密實啲，自己嚟海灘玩都唔會只着比堅尼，出面一定會加件衫。（怕畀人望？）係呀，我依家都仲未係好慣咁畀人望，同埋怕畀人望到有肥肉呀！」對於在本報訪問中大膽表示喜歡自己的「八字胸」，她解釋：「我係唔介意，呢啲與生俱來，唔可以同大自然對抗嘛！」
DaDa的個人月曆將推出，她表示第一次個人擔大旗，十分緊張和擔心銷量，希望可以賣到4、5千本，對公司有交代。由於造型性感，日前被暗寸月曆適合擺放廁所的DaDa並不介意，她笑言：「大家鍾意擺喺廳、房、廁所同廚房都冇問題，最緊要買，擺邊我都咁開心。」
G.E.M.獨自睇日出
另外，昨日海灘頗為炎熱，但高海寧在大會T恤下仍以長袖衫打底，被DaDa的纖腰搶盡風頭，高海寧也笑言：「係啦，真係着錯衫，我以為冬天嚟緊會凍啲，點知今日咁好天氣！」
至於G.E.M.則表示上一次到海灘是獨個兒看日出，問她會否在聖誕期間到台灣找緋聞男友林宥嘉一同看日出？她笑言：「冬天喎，會好凍！（攬住唔凍？）嘩！其實人與人之間有問候都已經好溫暖！」
文：影視組