朱明銳鬧爆港台：蠱蠱惑惑
新城電台知訊台台長朱明銳昨日出言炮轟香港電台蠱惑，先發動取消四台聯頒音樂大獎，後來又重新自設傳媒大獎，另頒獎禮日期又一改再改，令人無所適從，新城決定率先頒發十九個獎項，明剃對方眼眉。
「恒生勁爆Music World新城勁爆頒獎禮2010」將於12月29日假灣仔會展舉行，昨日一眾樂壇歌手齊集記者會為自己拉票，知訊台台長朱明銳透露今年獎項將由132個改為120個。
新城先頒19個獎
對於有傳港台於平安夜舉行頒獎禮，搶新城的頭啖湯，他說：「咁樣做嘢咪唔光明磊落囉，蠱蠱惑惑咁，無啦啦自己搞個傳媒大獎，唔係四台傳媒去評選，（你使唔使投票？）我一定拒絕，唔使邀請喇！突然唔玩四台聯頒，又要我哋投票支持，純粹係為港台自己開心！」他又指港台久久未決定頒獎禮日期及地點，導致一向是樂壇首張成績表的新城電台無所適從，於是昨日決定率先頒發十九個獎項，似乎明剃對方眼眉！
對於有傳港台頒獎禮分兩日舉行，朱明銳狂插：「呢啲咪好混，廣播處長都要換，依家係無政府狀態，身為納稅市民，我覺得港台應對樂壇做啲有益嘅嘢。（浪費納稅人嘅錢？）我覺得唔夠全面，香港冇純音樂電台，香港政府好失敗。」
而對於新城拒絕投票，港台「第33屆十大中文金曲」總監馮偉棠於電話中說：「冇嘢講，呢啲嘢冇得勉強，（佢斥港台蠱惑？）冇嘢回應。」
基仔大搞爛gag
而古巨基以歌曲《時代》先拔頭籌獲頒「新城勁爆播放指數大獎（歌曲）」，他在台上變身「爛gag王」說：「我未諗最想攞咩獎，不過今年最唔想拎嘅係拐杖！」他受訪時表示：「獎項冇諗太多，反而期望頒獎禮少啲風雨，以前都只係獎項數目上面鬥，今年係傳媒之間嘅爭鬥，（傳英皇唔去叱咤頒獎禮？）冇聽聞過，正如我喺微博睇到一句說話：『娛樂圈所有事都係浮雲』，大家平常心！」
新城勁爆頒獎禮
新城勁爆播放指數大獎（歌曲）
《時代》古巨基
新城勁爆播放指數大獎（歌手）
張敬軒
新城勁爆演繹大獎
謝安琪 / 關心妍 / G.E.M.
新城勁爆跳唱歌手
陳偉霆 / 鄧麗欣 / 狄易達
新城勁爆跳唱組合
HotCha
新城勁爆Hip Hop歌手
陳奐仁&MC Jin
新城勁爆流行爵士歌手
小琳
新城勁爆搖擺歌手
周國賢
新城勁爆專輯
《O'FAMA》農夫
新城勁爆專輯
《My Story Your Stories》鄺祖德
新城勁爆專輯（國語）
《無名‧詩》何韻詩
新城勁爆創作歌手
王梓軒 / 孫耀威 / G.E.M. / 王菀之
採訪：音樂組