High Tea：DaDa：我鍾意我個八字波
「百果園咪神」陳靜（DaDa）自知樣貌不及李嘉欣，但她恃着年輕博一博，最終憑D Cup本錢成為o靚界「峰」頭躉。其實她有苦自己知，默默忍受親友批評。雖然慘遭同行圍插胸墮，但她仍樂觀地說：「我鍾意我個八字波！」
美貌不敵身材搭夠
「我唔係特別靚，只係個樣可以好清純同百變，一直以嚟靠呢個感覺去配合客戶而接job。唔係因為唔靚而行性感，靚過我嘅人好多，但我唔係肉酸！由細到大都唔覺得有身材可以紅，只係夠廿一歲，鍾意呢行，想有轉捩點，而且多咗o靚模，可以試水着，影咗輯比堅尼相後就愈嚟愈性感。試過有個位接受唔到，匿喺屋企諗過使唔使着到咁？覺得仲後生可以博一博，就變成依家條路線，但我都有底線。」
「尤其自己性感，唔想畀人覺得性感就要畀人掂。我介意畀人掂腰！試過喺活動有個外籍來賓傍住我條腰嚇親。亦試過畀人性騷擾，有個龍友睇完我着粉紅色泳衣，鍾意胸前個蝴蝶結，喺facebook同我講『想進入你嘅粉紅色世界』。之後佢叫我影合照，我都唔會。朋友會用身材講笑，但摸就唔得，如果喺身體上一次、兩次咁騷擾我，我一定唔對佢客氣。」
同行寸爆親友批評
「o靚模Caroline（冬甩成員）話我個胸墮？我個胸係八字，天然，天生係咁，所以我鍾意我個八字波！唔一定堅挺先好睇。佢之前話我時大時細，打假波，我驗完胸冇嘢好講，先話我胸形唔靚，唔好用個胸去話人。同A. Lin係hi bye friend，佢話我月曆放喺廁所，佢想入屋，都唔明佢講乜？廁所喺屋入面，係一部分，唔通佢唔去屋企廁所去公廁？有得出月曆已經好開心，心存感激，廁所月曆都叫入咗屋吖！」
「好朋友問過我嘅堅持去咗邊？我承認有改變，但我仲係我！以前堅持唔接性感工作，依家變咗唔鍾意都會做。我同佢解釋年紀唔同咗，有一排靜咗冇嘢做，我諗唔通要做番美容？我唔甘心，覺得未盡全力去做一件事，就犧牲少少，睇吓有冇得着。好彩朋友都諒解我。最慘係畀親屬講，怕媽咪難受！佢哋同媽咪講我太性感，媽咪處處維護。好耐冇見親戚，依家知我拍戲個態度唔同咗，仲話介紹姪仔畀我識，真係好現實！但我都有照去聚會。仲有個同學基本上都唔熟，狂叫我去佢婚禮，但撞時間去唔到。」
冇被杯葛曾遭白眼
「我要澄清，拍《潮性辦公室》一定冇畀莊思敏同呂慧儀杯葛！開始時會驚，啲報道話莊思敏唔鍾意o靚模，原來佢好nice，談吐斯文，好鍾意佢性格。呂慧儀就唔熟，無綫人對人有一套方法，而且冇畀人叫『阿邊個』，幕後工作人員都有問我，仲講笑話以為我夾新聞。」
「出活動就試過畀人白眼，係個做得比較耐、消失咗一排嘅女藝人，好似好唔想同我合照！記者叫我哋合照，佢冇拒絕，但就唔郁，但喺後台就有打招呼。」
否認貪錢自食其力
近期樓市飆升，對於蝸居問題，DaDa說：「當然想愈住愈好，但唔係貪慕虛榮而由屯門搬去尖沙咀，唔想做同屋住嘅電燈膽。媽咪經常灌輸男人靠唔住嘅訊息，凡事要靠自己，係要有樓先結婚，我或者另一半有都得。買樓、結婚、生BB係人生階段，冇諗過喺呢行好耐，幸運咁做五、六年已經開心。」
文：專案組
攝：黃叔榮
化妝：Pinko@Jacso
場地：麗星郵輪寶瓶星號