玩具大王蔡志明孻仔蔡加讚，月前把他一手創辦的甜品店「甜之迷」轉型做意大利餐廳，加讚說：「因為甜品店座位咁多，做餐廳會好啲，加上自己好鍾意食意大利菜，呢一區又比較少。不過我好鍾意個名，所以唔會轉。今次轉型花咗成百萬，廚房嘅設備要轉過晒，仲有高薪挖角，個廚師係我自己發掘嘅，廚藝好有水準。我試菜肥咗八磅，爹哋都有嚟試，佢食嘢唔挑剔，話啲嘢好好食，最鍾意食烤乳豬。」
加讚又謂未有拖拍，他說：「圈子太細識唔到女仔，寧願唔識住。（驚唔驚人哋以為你係基？）唔會，我屋企得我一粒仔，靠我傳宗接代架。（爹哋安排相睇？）佢唔做啲咁老土嘅嘢。」
