祖兒晒事業線hot爆紅館

樂壇天后容祖兒演唱會昨晚以性感造型開騷，大騷「事業線」，好友何韻詩抽空支持，甫開場就起身陪唱，祖兒同日宣布六度加場，以終極十二場次打破個人紀錄，氣勢銳不可當！

祖兒一共十二場假紅館舉行的《Nokia 祖兒Yung Concert Number 6容祖兒演唱會》昨晚正式開鑼，同日宣布加開12月4日一場，合共十二場，再次打破祖兒的個人紀錄，昨晚祖兒媽咪、老闆楊受成及太太、吳雨、鍾欣桐、陳偉霆、何超雲等成為座上客，而祖兒的好友何韻詩毫不忌諱霸個靚位捧場。

祖兒的透視裝扮，每個動作都令人熱血沸騰。

何韻詩全程陪唱

祖兒甫開場以性感超低V的毛毛美國西部牛女造型由台底彈上舞台，禾稈冚珍珠的她乍現長長的「事業線」，大唱《逃》及《跑步機上》兩首快歌，將45度傾斜及倒豎葱再次重現舞台，台下的阿詩企起身全程陪唱，睇得非常投入。祖兒在台上說：「大家好，呢個演唱會籌備成年，雖然只係集訓一個月，多謝入場觀眾陪我一齊分享成果，最緊要睇得開心！」

開騷前，祖兒全身包到實一實避免造型曝光，連同媽咪、吳雨、無綫高層樂易玲及何麗全參與拜神儀式，歌迷在鐵馬外圍大叫「Good Show！」心情興奮的祖兒立刻揮手兼送飛吻回應，非常風騷。