藝人開心撐陳總歸位
無綫總經理陳志雲處於候審期間，突然高調復職重返無綫懷抱，事出突然成為藝人之間熱話，而一班藝人對事件各持不同意見。
與陳志雲友好的古巨基：好戥佢開心，我遲啲會直接打電話畀佢。
呂慧儀：替佢開心，返嚟梗係好啦。（佢仲有案件在身？）法庭都未判，我唔係公司高層，唔清楚。以佢嘅才華唔只管藝人，無所謂啦。
梁政珏：開工途中知道消息，（有官司在身唔適合復工？）我唔清楚件事嘅來龍去脈，唔方便評論，好多嘢睇報道至知。
麥長青：開心，不嬲陳生嘅工作表現大家有目共睹，對公司嚟講都好，之前嘅司法程序都一定要經過，依家復職係一件好事，我好鍾意睇佢做節目，佢幾感性。
陳百祥：陳總有需要咪返嚟囉，可能公司覺得佢管理能力好好，可以穩定軍心。（有傳佢返嚟同四大唱片傾合作。）哦，嗰個係小project嚟嘅啫。
陳法拉：係開心事，（歡迎佢返嚟？）唔到我話事，我冇分量去講，（官司在身唔適合復工？）唔方便評論，我太唔清楚件事，（冇得處理藝員嘅事，）慢慢嚟啦，佢職位咁高，覆蓋嘅工作範圍好多，有冇都冇關係。
蘇玉華：每個員工都希望有個好上司，佢冇事當然好高興，（官司未完喎？）唔識評價，司法方面自己唔熟，公司覺得佢可以就冇問題。
馬德鐘：真係恭喜佢，（有官司喺身唔適合復工？）公司有自己立場，其實以前陳總處理業務都處理得好好，所以依家返嚟咪好，絕對對佢有信心。