錢國偉未諗回娘家
與陳志雲同被捲入涉貪案的錢國偉與寧進，對於志雲復工大表高興，沒有跟無綫續約的寧進表示開心：「我啱啱先知，都有傳短訊畀佢（志雲），叫佢請食飯，佢話當然啦。（會唔會返去？）順其自然啦，我依家搞生意都唔急住做其他嘢，有緣再算，唔會太強求。」
離開無綫之後，以自由身接騷的錢國偉則說：「恭喜佢，梗係開心，之前都有傳短訊聯絡，今日都有傳。（佢復工你返去TVB嘅機會係咪大啲？）暫時唔會，我接嘅工作去到出年三、四月，之後仲要搞幾個演唱會，包括埋《福祿壽》嗰個，做完先算啦。（陳志雲有冇叫你返去？）點會咁快，今日佢先返工。」
陳志雲復職無綫總經理，令人聯想到市場及營業部業務拓展主管陳永孫何時復職？外事部副總監曾醒明說：「因為陳志雲係高級管理階級，所以會先行處理，至於陳永孫，會之後再作考慮。」