時間錦囊：江若琳星途見證夢成真
江若琳入行已四年，四年內發生了很多她未有想過的事情，亦實現了不少夢想。所以她希望透過時間錦囊去留住這一切回憶和重要時刻。
入行第一個獎項
「我自小好鍾意唱歌，能夠做歌手簡直係夢想成真。07年我拿到十大勁歌金曲頒獎禮嘅最受歡迎女新人獎，個獎對我有好大意義，令我感到努力沒有白費，要與公司、朋友、家人和fans一齊分享。我會將個獎好好保存，直到永遠。」
水着寫真大突破
「入行第一年我就有機會推出寫真，仲有機會去菲律賓取景，好感激公司。首次着泳衣見人，對我嚟講係一個大突破，可謂史無前例，值得留念。」
分享《零距離》
「出散文集唔係要做才女，係希望將我入行後嘅感受，所見所聞和一點一滴，用文字寫出嚟與歌迷一齊分享。fans對我嚟講好重要，佢哋由我出道跟到我依家，希望可以一直同佢哋保持零距離，做到永遠的朋友。」
第一個演唱會
「回憶只能在腦海中保存。2010年我開咗首個個人演唱會，放咗好多心機去做，過程雖然辛苦，但得到大家認同，嗰種喜悅難以形容。演唱會會永遠留喺我腦海中，但唯一能夠保存嘅，惟有收起這張海報。」
威尼斯行紅地氈
「拍電影係我未有想過嘅，而有幸拍到一部立體《童眼》，更是夫復何求。電影更令我有機會參與國際性嘅威尼斯影展，第一次踏足這個地方，眼界大開。這張照片係我踏上首映紅地氈時拍下的，何國鉦設計件晚裝好靚，我會保存張相來作個美好回憶。」
