基仔傷困擾：健康更重要

基仔昨日帶埋師妹鍾舒漫（Sherman）為「蘭桂坊嘉年華2010」揭幕，近來腰骨舊患復發的他行路似乎有所改善，毋須用輪椅或拐杖幫助，但上落台時多番用手扶住腰間借力。

問到腰傷情況，基仔說：「睇咗好多不同醫生，其實好番唔少，依家都係避免用太多力，所以用手幫一幫，好想放低支拐杖！」對於有傳基仔為無綫重頭劇《巾幗梟雄２之義海豪情》唱主題曲，正正是換取男歌手獎項的籌碼，坐硬歌王寶座，基仔說：「完全冇諗過關於頒獎禮嘅事，最近都係忙緊舖頭開分店嘅事，依家冇嘢比健康更重要，醫好條腰先再講，（腰患好困擾？）除咗痛之外，屁股附近肌肉都會麻痹，搞到個人無覺好瞓，真係比較困擾！」

放低支拐杖的基仔，仍不時要用手傍住條腰。

Sherman（右）曾在嘉年華內玩相遇，撞到心儀男仔。

學日劇玩相遇

此外，一向喜歡參與嘉年華會的Sherman表示，曾經為見心儀男仔到嘉年華會玩「相遇遊戲」，她說：「好似日劇劇情咁，諗住去嘉年華睇吓撞唔撞到佢，後尾真係撞到，仲四眼對望，後來就一齊咗！」對於同樣是基督徒的王祖藍宣布拍拖，Sherman表示戥對方開心，希望愈來愈多圈中情侶公開戀情，令藝人拍拖都可以輕鬆自在。

文：音樂組