方珈悠老尖遊蕩魚蛋充早餐

樂壇新人方珈悠(Jaime)破格出招大賣性感,雖然令她人氣急升,可惜「好睇唔好食」未有開拓其「錢」途,就算肚餓都只能揀幾蚊雞的魚蛋醫肚,見到耀目鑽飾也得個「恨」字。

陳柏宇師妹Jaime早前推出性感電子寫真,電得一班「電車男」暈得一陣陣。日前記者在尖沙咀巧遇Jaime,收起性感的她身穿T恤短褲襯leggings,獨自前往便利店購買飲品,然後走過對面馬路當街品嘗咖喱魚蛋,食得津津有味的她不顧儀態大啖大啖吃。

飲飽食醉後,Jaime逕自到附近商場shopping,她先到一間運動店巡視,並對其中一對白色波鞋感興趣,但拿上手看了看又放回原位,之後再轉戰鑽飾舖,雖然她向店員要求拿出一枚鑽戒,但研究一輪後又同樣齋睇無幫襯,認真混吉,在街上漫無目的閒逛一輪後,Jaime滿臉寂寞的離開。

漫遊等朋友

事後記者致電Jaime,問她為何獨自逛街?她驚訝表示:「哎呀,點解我唔知有記者影我嘅?」她解釋當日相約了朋友到尖沙咀看電影兼吃晚飯,但因友人遲到,所以才獨個兒逛商場,記者笑她當街食魚蛋?她則說:「我瞓醒冇幾耐嘛,咪買串魚蛋食囉!」

文:音樂組