何浚尉泰國艷遇雞同鴨講
Square成員之一何浚尉（Rex）經常四出旅行，泰國亦是他常到的地方之一。早前，他隨公司到泰國拍攝電影《童眼》，在當地工作之餘亦順道暢遊一番，他說：「今次拍攝得好開心，因為可以同師姐江若琳和師妹林司敏成日見面，成班後生仔女一齊玩得特別開心。」
由於遊泰國經驗豐富，Rex常充當導遊，一有空便帶眾人出外逛街和作樂，有次更遇上艷遇：「有次我帶佢哋去打保齡，隔籬有一班當地嘅女仔喺度，佢哋不時望過嚟我哋呢邊。後嚟有個女仔好主動過嚟同我打招呼。點知佢一開聲就係講泰文，原來佢以為我係當地人，到我講英文時先知我唔係泰國人，佢就咁走咗。」
他直言已不是第一次被誤認泰國人，所以見怪不怪，至於會否嘗試異地情，Rex雖然對此不抗拒，但他更着重緣分，一切隨緣。
場地：Bomber Gym by Wunique