鍾嘉欣撐林峯：仲後生
無綫親生仔林峯早前備受批評，樂易玲及方逸華隨即高調力撐，身為林峯緋聞女友的鍾嘉欣，揚言不管林峯票房好壞，都會全力支持，更謂對方仲後生，做好本分就夠。
昨日無綫花旦鍾嘉欣、謝婷婷、莊思敏和汪圓圓等為於HomeSquare舉行的《家居八面玲瓏時裝巡禮》行騷，眾人演繹以家庭用品作題材的服裝。鍾嘉欣以水晶燈飾設計的晚裝壓軸出場，謝婷婷以梳化為主題的性感晚裝上陣，汪圓圓則「睡床」上身，隆胸後的莊思敏穿上貼了不少磁磚的低胸裙，更見來勢「胸」洶！
最重要做好本分
早前邵氏高層黃家禧酒後指林峯孭飛電影票房差，樂易玲其後親攜老闆方逸華的鼓勵信為愛將打氣，令林峯即感動得眼濕濕！鍾嘉欣說：「六嬸（方逸華）寫信畀任何一個藝人都會好感動，知佢不嬲都錫我哋。做藝人最重要做好本分，其他嘢控制唔到。」鍾嘉欣續說：「一部戲唔代表所有嘢，阿峯仲後生，我唔專業唔識分，只識做好自己本分，總有人欣賞或唔欣賞自己。」她又表示雖很忙冇時間看對方的新片，但之後定會買影碟捧場。
汪圓圓拍戲上癮
最近和張栢芝及古天樂合演《最強囍事》的汪圓圓，大讚栢芝又fit又靚，但不敢上前請教演技，只會站在一旁偷師，笑言愛上演戲外，更愛上吃飯盒，人人不分彼此一齊吃飯盒。而露出泳衣印的謝婷婷，表示有空閒便會和男友安志杰游水。
文：名人組