爛牛湯唯唔妥張栢芝

湯唯、張栢芝、劉若英近期齊齊「孭兩組」，三人分別要拍《武俠》、《最強囍事》、《瞞婚男女》等電影，所以需要不時穿梭多地開工，令三人合演的新片《極速天使》（暫名）群戲極難度期，就得湯唯，又未必就到栢芝、劉若英，令劇組叫苦連天，有傳導演因此刪了多場群戲，以免拖延拍攝進度。

好演技值得等

記者就此事致電導演馬楚成，他亦承認三女難度期，令劇組叫苦，但就冇刪戲一事，他表示：「佢哋三個女仔嘅群戲好重要，唔可以刪，都知佢哋三個難度期，但佢哋外形同演技都咁好，值得等嘅。」

原本上星期要拍的一場群戲，劇組「度完又度」，終於昨晚在上海開工！昨日約下午五時半，接載湯唯、劉若英的座駕到場，從大廈停車場直入拍攝場地，導演馬楚成即向兩人講解情況。現場所見，湯唯的造型頗為豪邁，彩色頭巾配爛牛仔褲，有別以往的斯文角色。

張栢芝與劉若英未埋位時，相當好傾。

剪了新髮型的劉若英，造型清爽。

過百市民圍觀

約三小時後，張栢芝之座駕亦到達，之後，三人開始拍攝群戲，據知，劇情講述原本在戲中不咬弦的湯唯與張栢芝，在鑽飾店舖遇上，劉若英則是湯唯好友，三人戲外雖然極難度期，聚首時間不多，但難得三人的感情卻非常要好，不用埋位時經常密密斟，而栢芝弟弟張栢文亦有到現場探家姐班。

由於拍攝地點乃上海鬧市加上昨天是周日，所以吸引過百市民在商店外圍觀，熱鬧非常！

文：影視組