黃貫中細佬中招標血入院

黃貫中（Paul）應威士忌品牌邀請到內地登台，昨日凌晨十二時許，Paul還未出場，二樓觀眾席突然發生打鬥，玻璃樽和酒杯橫飛，Paul胞弟、樂隊Anodize成員黃貫其（阿其）正在台上調校結他，不幸被誤中副車，一個破爛玻璃樽飛埋身，左手掌即血流如注，工作人員見狀送他到醫院，而在後台的Paul得知此事即飛車到醫院照顧弟弟，大會亦報公安。出名愛錫弟弟的Paul事後凌晨一時許激動在微博爆粗：「他X的！還未開始，已經打到滿台血，阿其手傷到見骨頭，真的火了，失控了，這裏幹甚麼？」身在香港的女友朱茵隨即留言慰問，她亦肉緊對現場保安表示不滿，同時亦掀起圈中人議論紛紛和留言問候。

誓緝真兇

昨日記者致電Paul，他氣憤難平說：「當時我未出場，喺後台準備，都唔知發生咩事，凈係知道細佬（阿其）無端端受傷，左手虎口位流好多血，即刻入院縫針。當時好混亂，縫咗幾多針我都唔知，總之今（昨）日天光我哋立即第一時間返香港入院再縫過。搞咗成晚，我哋廿四小時無瞓，好攰、好躁。細佬要彈結他，隻手受傷好大鑊。我好內疚，因為帶細佬去做騷，發生咁嘅事我驚被家人責怪。」至於當晚未開騷就散場，大會有無追究？Paul說：「我唔理得咁多。」他又謂要徹查真相：「我要查清楚來龍去脈，亦要向公眾交代，唔想無辜被影響形象，影響將來內地接騷。」

返港留醫

昨日Paul陪同阿其返港即到醫院照X光，等候診斷報告，阿其則留院觀察。原本昨午前往欣賞女友朱茵舞台劇尾場的Paul，身心俱疲無法應約，他獨自驅車返家休息，期間見到記者表現大方，他說：「今次真係黑仔，抵成都已經唔見咗兩箱行李，包括器材和私人物品，估不到禍不單行。」而Paul經理人Ada昨晚亦發出聲明交代事情始末，並感謝主辦單位全力協助求醫和報公安，他們返港後主辦單位繼續跟進事件。

文：專案組　攝：追蹤組