Joey失大獎：冇唔開心
英皇反杯葛「四台聯頒」還以顏色，白白失去「傳媒大獎」的容祖兒（Joey）坦言冇唔開心，盡顯天后風範！而四台之一的無綫則炮轟停辦決定太草率，對付出努力的歌手不公平。
樂壇頒獎禮如箭在弦，「四台聯頒音樂大獎」前日卻宣布停辦一年，令本來有機會四度蟬聯「傳媒大獎」的Joey好夢成空。其他有機會奪「大碟大獎」的古巨基、RubberBand、「歌曲大獎」熱門的Joey、基仔、楊千嬅及「卓越表現大獎」的G.E.M.、林峯、鍾舒漫均捧獎幻滅，全城嘩然。英皇和東亞即聯手發聲明表示永不參賽，摑回有關方面一巴。
阿嬌力撐：有目共睹
Joey昨晚現身江門出席無綫《群星閃耀江門情》節目，對於「四台聯頒」停辦，她淡然說：「唔識睇，未理解，決策留公司決定，自己冇唔開心。（公司有冇同你商量？）冇，唔止我一個受影響。獎項係唔同媒體喺頒獎禮上畀歌手嘅獎勵，每人心目中想畀喜歡歌手。我只想做好自己工作，唔想牽涉千絲萬縷。」鍾欣桐（阿嬌）亦力撐：「支持公司決定，冇覺得可惜，Joey努力有目共睹，只係冇四台聯頒嘅獎項。所有歌手好努力，獎項唔代表一切。」
無綫高層何麗全坦言停辦好無謂：「咁做冇意思，唔夠公信力，過往都有唱片公司以唔同原因唔出席頒獎禮。今次決定太草率，搞到呢個局面好可惜，對努力過嘅歌手唔公平。」問到無綫跟四大唱片關係？他說：「大家有讓步，傾掂六成，克勤都想快啲傾成。（會唔會對亮相亞視、有線嘅四台歌手問責？）冇資格封殺人亦冇權力。」
謝安琪：歌手係被動
環球歌手謝安琪對「四台聯頒」停辦表示：「獎項由媒界頒發，歌手係被動位置。（取消對環球公平啲？）唔係獨立睇，自己冇任何感受，有獎係鼓勵。」東亞歌手千嬅則說：「當然尊重公司決定，咁做有必然理由。」問到會否出席四台的頒獎禮？千嬅說：「盡力，唔敢應承。」她又稱現在忙結婚擺酒，並已影結婚相。
而廣播處長（電視）張文新認為現時環境，沒可能一台獨大。他說：「外資同本地唱片公司分歧，令部分歌手上唔到無綫，大家各有機制，港台支持公平公開嘅頒獎禮。」
文：音樂組