林峯眼濕濕鬥志重燃
【蔡志豪天津直擊】貴為無綫親生仔的林峯，早前被邵氏高層黃家禧酒後指他孭飛電影票房差，根本撐不起市場。連日來保持緘默的林峯，昨日現身天津時首度回應，樂易玲更攜同老闆娘方逸華（六嬸）親筆題字的鼓勵信給他，難怪林峯看完眼濕濕，更揚言：「鬥心真係返晒嚟！」
自黃家禧爆料後，林峯一直於內地開工，未有就事件作出回應。《2010國際中華小姐競選》昨晚於天津舉行，身為嘉賓之一的林峯在無綫高層樂易玲陪同下會見傳媒，為事件首度回應。
林峯坦言未看過有關報道，自言今年才於影壇起步，願意接受所有意見，並承諾會繼續努力。他說：「我冇嬲過，當時係由人哋口中得知呢件事，不過前輩對我有唔同評價，會令自己諗有咩可以進步。」之後樂小姐手拿一本簿遞給林峯，內裏夾着一張由六嬸親筆寫的字句「無懼閒言，好評如潮，再創佳績。」眼見老闆娘如此力撐，林峯即場眼濕濕。
清楚流無綫血
提到今年陳豪與黎耀祥奪視帝呼聲高，林峯坦言每年都以平常心看待，入行雖有十多年，但公司前輩們大有人在，作為後輩的他只需做好本分。他說：「方小姐今日張鼓勵字句，我真係覺得好意外，都未識得反應，估唔到佢會留意我工作。之前好多前輩都話流住無綫嘅血，依家終於明白，有咁好嘅老闆睇住同體諒我，鬥心真係返晒嚟！問我有冇信心攞獎？我有o架！」
樂小姐表示有意呼籲旗下同事戒酒，對於黃家禧爆公司內幕，她謂：「係真先叫內幕。（酒後吐真言喎！）都唔係真。（方小姐有冇為件事唔高興？）每星期都將公司嘢報告佢知，佢明白係咩事，當日發生件事我都係睇報紙先知，需要冷靜後再睇多次，唔激動同唔嬲，只係覺得好大鑊。」
黎耀祥昨日接受電話訪問時，對於林峯獲公司力撐大呼好事：「最重要係老闆鍾意，戥佢開心，我睇好佢，繼續努力。（角逐視帝有冇壓力？）唔會，點會呢？」
六嬸事事關心
此外，有傳李家傑擱置購入無綫，全因其目標為清水灣的幾幅地皮，而非無綫。再加上日前賣地成績不理想，預料地產市道有下滑迹象，變相令該些地皮有機會未能升到心水價錢，所以放棄收購。眼見公司未能成功售出，六嬸亦立刻「歸位」，對公司上下事事關心，如今還親筆題字鼓勵林峯，難怪消息人士亦謂：「如果賣得出，仲使咩咁緊張？」
文：影視組