非凡哥看透人生：錢重要過獎

麥長青（麥包）入行廿三年，遇到有發揮的角色不止於「非凡哥」一個，於劇集《茶是故鄉濃》、《聊齋》、《無頭東宮》、《原來愛上賊》中，麥包都有不俗的演出及發揮機會，不過，今次的角色效應來得較特別，麥包坦言入行多年，從未試過三日做十個專訪，總算覺得廿三年來沒枉過，麥包續說：「以前拍《西遊記》，收視好，好興奮，跟住再拍《聊齋》，不過，拍完《茶是故鄉濃》之後兩年又行行企企，嗰陣好沮喪。直至媽媽同細佬患重病，我先開始徬徨，要諗條出路畀自己，其實到依家我都兼職做巿場策劃工作，幸好行內人賞識。」數年前，他的弟弟及母親都不幸患癌症，弟弟5年前更病逝，令麥包深受打擊。

學識知足常樂

麥包九九年結婚，之後生了一子一女，家庭生活上不算太富足，同期入行的有林文龍、郭富城，眼見其他人搵到錢，他不會恨，知足常樂。他說：「一個人太順利唔識諗，反而會變悲劇。我喺順德長大，十二歲先落嚟香港，嗰陣每日食飯都係撈沙糖、片糖，肉都冇，九歲時都唔知乜嘢係底褲，着鞋？我只係知去廣州返工先有得着囉！」

預告結局要死

今次於《巾幗梟雄之義海豪情》中的非凡哥角色令麥包再被注視，問麥包會否希望於台慶攞男配角獎項，他說：「呢樣嘢我真係唔渴求，畀我揀，我寧願要錢，我亦都想套劇攞最佳劇集獎，因為team work好緊要，特別係呢套劇嘅臨時演員，就連臨時演員阿頭都會睇劇本，然後教佢哋做戲，真係好難得，獎項有係好彩，冇係正常。」

麥包今次坦言要多謝監製李添勝及編審張華標寫了這個好發揮角色給他去演，他謂：「其實非凡哥戲唔算好多，但大家見到佢大奸大惡之餘，亦睇到佢暗地做咗好多嘢，角色好立體，對冬妮（江美儀飾）永遠表露最好一面，之後，佢又會同另一個女人（葉凱茵飾）走在一起，此人是劇中唯一會對非凡哥講真心話的人。」麥包透露：「到最尾非凡哥都係要死嘅，我好鍾意呢個結局，冤有頭債有主，睇吓你幾時還啫！」

文：影視組　攝：李廣成

場地：諾士佛臺（island seafood）