黃婉曼起晒雞皮賺外快
最近「天氣女神」黃婉曼（Icy）憑健康形象殺入廣告界，可惜財多身子弱的她受不住狂風吹襲，令她頻頻食「螺絲」NG，起晒雞皮的她即笑說：「我賺嘅都係辛苦錢。」
早前密密吸金搵銀的黃婉曼（Icy）接拍「Kiwi Cool」健康飲品廣告，由於其廣告力sell清熱，所以前往海灘取景的她更以貼身鮮藍色背心裙上陣，大晒玲瓏浮凸的E級身材。
食「螺絲」失準
可惜當日天氣突然驟降只得攝氏十幾度，導演不僅要求Icy邊行邊講長對白，還要她赤腳扮relax飲凍飲，加上期間又不時有一陣陣海風吹襲，令做慣主持的她都凍到頻頻食「螺絲」，搞到連續NG近十次，就連工作人員都忍不住讓她休息幾分鐘才繼續，認真我見猶憐。
被問到平日口齒伶俐的Icy失準，她直認說：「我最怕凍，頭先畀風吹到成個腦實晒，但為工作都要頂硬上，惟有死忍快啲拍完佢。（財多身子弱？）我賺嘅都係辛苦錢。」
珍惜搵錢機會
最後拍到起晒雞皮的Icy終於順利完成工作，工作人員還第一時間送上外套，非常好服侍。她指最近工作連串而來，她亦會好好珍惜每個機會，她坦言：「真係唔知大家幾時唔再需要黃婉曼，所以想趁後生努力搵多啲積穀防饑。」
文、攝：專案組