曹敏莉擺喜宴啜歪嘴
上月秘密在美國簽紙結婚的曹敏莉（Mandy）昨晚在四季酒店擺喜酒，她與丈夫張家傑應要求連咀五六次拍照，Mandy笑說：「咀到嘴都歪埋！」雖然她指生BB順其自然，但已預習湊B換尿片，似為「造人」做好準備。
Mandy與金融才俊張家傑（Jacky）上月秘密在美國簽紙結婚，昨晚兩人在四季酒店筵開十九席宴請親朋，出席到賀的圈中人包括陳法蓉、李詩韻、趙雅芝等。
昨晚約六時Mandy身穿五位數字由意大利設計師設計的婚紗與丈夫Jacky齊齊見傳媒，兩人應要求「錫錫」，來來回回錫了五、六次後，Mandy笑說：「錫到嘴都歪埋。」之後Jacky留下Mandy接受傳媒訪問，他說：「我唔識講嘢，等Mandy同你哋傾啦！」十分害羞。
婚宴花費近百萬
接受訪問時Mandy難掩興奮心情，指婚宴籌備已久，花費接近七位數字，現場有樂隊伴奏，老公更會在席間表演吹奏色士風。因兩人皆喜歡簡單低調，故未有安排兄弟姊妹團，Mandy只找來胞妹曹蕙蘭擔任伴娘：「尋晚發夢聽到有人問我心情緊唔緊張，原來係我老公問我。今朝七點已經醒咗，然後就敷mask做準備。老公今朝都仲要返公司做嘢，佢信得過我會安排好婚宴。」
照顧小朋友有經驗
問Mandy婚後會否不設防造人﹖她說順其自然：「老爺奶奶都冇催，度完蜜月先算啦，唔心急。不過，近來都有幫手照顧家姐個ＢＢ，幫手換尿片，照顧小朋友都有一定經驗。」
好友李詩韻一早到場打點，現時仍單身的她都想認識真命天子：「不過都唔心急，心急會做錯事，唔想拍拖又散。」昨日生日的陳法蓉被問到感情可有着落？她說：「雖然之前接到蔡少芬嗰花球，但係都未有着落，順其自然啦。」
文：影視組