(13)廖祉甯紅上腦︰打跛腳唔憂
十三名亞姐昨日分別以古裝及時裝造型與張達明試戲，藉此宣傳新劇。當中達明更被佳麗狂攬七次，艷福不淺！另(13)廖祉甯（Barbie姐）在訪問時仍貫徹其囂爆作風，稱屋企人覺得她將走紅，就算打跛隻腳唔使憂！
《2010亞洲小姐競選》決賽將於十二月初舉行，昨日十三名亞姐為亞視新劇試戲時笑料百出，不諳廣東話的(6)李瑩瑩將「師傅」讀錯為「士敷」，(12)閔蘭在演古裝劇時竟說英語等。但當中仍以「Barbie姐」表現最為「突出」，她在試戲時不惜赤腳上陣，坐地撒嬌狂冧達明，達明似乎甚為受落！其後達明更大讚「Barbie姐」具創意、演戲有感覺，又認為(5)萬嘉麗勝在自然，而(11)吳素嫻的反串演出更被達明讚她為「現代任劍輝」。
大髀瘀傷係紋身
不過當「Barbie姐」接受訪問時則表現語無倫次，當記者發現她大髀的瘀傷時，她竟稱：「我屋企人覺得我就嚟紅，就算打跛隻腳唔使憂，所以我要去學定跌打！」此言一出全場驚訝，記者追問其瘀傷原因，她又說：「呢個係最新嘅紋身，仲捽得甩架！」她又不停宣傳其即將推出的公仔，更吩咐記者說：「照登就得。」其後記者追問她多次缺席宣傳的原因，「Barbie姐」即寸嘴回應：「乜你哋唔係話我五度缺席咩？你哋講邊次？」其後她更大言不慚的表示自己「財多身子弱」，吹水程度令人嘩然。
獲(11)吳素嫻維護
同場的(11)吳素嫻則表現謙虛得多，被問及她對「Barbie姐」的印象時，她就得體地表示：「我同佢溝通到，（佢講嘢失控？）佢好聰明，諗嘢比較多，所以講嘢都多啲。」
文：影視組