斜孭手機袋：去年生日有位異性朋友送咗個手機袋畀我，真係好方便，我唔使再唔見手機，仲唔會miss佢啲短訊同電話，呢份禮物好有心思。
迷你喇叭：呢個喇叭仔係fans送嘅，唔好睇佢外形「的骰」，其實好鬼大聲，有時整頭髮或化妝嗰陣，我唔方便戴耳筒，呢個size啱啱好，可以隨時練歌。
鎖匙包：試過唔見成串鎖匙，搞到屋企人好擔心，仲話我係烏龍王。自此之後，家人叫我買個鎖匙包袋好，我就買咗呢個方便攜帶而款式都幾潮嘅匙包。
眼鏡：呢副眼鏡同我飽歷風霜，有時出街冇時間化妝，可以遮吓眼圈，有次出席活動時，唔知有傳媒在場，咁啱我冇化妝，有啲狼狽，好彩戴咗副眼鏡擋住，仲畀人話似「小雲」呢﹗
