深情對話：朱茵不屑講星爺：我夠絕

記： 記者 朱 ：朱茵

恩斷義絕 百「馳」莫辯

記：你喺《志雲飯局》中提過14年前曾「捉姦在床」，件事係點？

朱：首先，我冇提過任何人（強調多次），我唔想影響到人，嗰次係我嘅成長經歷，我唔想拉任何人落水。啲人估係邊個同邊個，哈……，唔關佢哋事架。當時我睇唔到樣，我真係唔知邊個。算啦！事隔咁耐，或者係男人啦，嘻……，我唔會刻意去查證，係邊個邊個唔重要。

一刀割落自己度

記：呢段情係咪傷得你最深？

朱：其實冇一段情唔傷喎，不過當時我好細個，連愛情係乜都唔知，依家諗番至發現之前嗰啲唔係愛，只係我愛上愛情，搵啲人去投射，唔關得唔得到對方全部嘅事，嗰時自己係盲咗，一個人嘅優點同缺點都完全睇唔到，一句說話都可以令我上上落落，但嗰啲係咪我要嘅呢？可能唔係，我只係覺得要談一場戀愛。

記：《西遊記》導演劉鎮偉話過周星馳放棄你，佢一定會後悔。

朱：大家關心我，好開心，好sweet，但我講畀大家聽原意係，無論我係咪靚女、性感女神，乜都好，都會遇見呢啲唔適合、會傷害你嘅男人。

記：你嗰時搵咩人開解？點樣自救？

朱：我自尊係受傷，但自尊心都好強，嗰次我喺大陸，事發後我第一時間打長途電話畀媽咪，嗰時唔興手提電話，我要去唯一一間有長途電話嘅房借電話同媽咪呻，我有喊，但唔記得內容，好彩係……我係好自我嘅人，結果我過到之餘，上咗人生一課，畀愛情傷害過，但會令人瞬間長大咗。

記：嗰個人有冇向你講對唔住？

朱：冇冇冇冇，唔好同我講添（厭棄），我直頭係可以轉埋電話、搬埋屋嗰啲人，（極堅定語氣）我係好絕嘅人，真係好絕，自己痛一回事，我會掹晒電話，如果佢再打電話嚟搵我，我可以鬧佢，我絕得好緊要，我寧願一刀割落自己度，等佢流血、復原，最多多撻疤啫，唔會用把刀割割割，不斷割自己，我係唔會回頭。

難容忍不忠男友

記：有資深傳媒人爆料，話好多年前喺台北，你同周星馳喺一間酒店分別出席活動，周星馳知你喺度，就喺門口等你，但你收到消息，即喺後門走，係咪真有其事？

朱：好似係有咁嘅事，走、走、走，我即刻走，有錫我嘅人話我聽，我真係好絕，我唔信冇咗邊個唔得囉，尤其嗰個都唔係愛情。冇人信我係啲咁嘅人囉。

如果有日喺街偶然撞到我會點？我諗我會即刻掉頭走，我覺得做唔到任何朋友，你走你嘅陽關路。我同曾經拍過拖嘅人，全部都做唔到朋友，根本都冇交往。我覺得冇必要再有任何「喇」囉，工作上曾做過朋友……唔係，只係曾經合作過嘅拍檔，之後冇來往、冇聯絡，已經唔係（朋友）啦。

記：對不忠嘅男友絕對唔可以容忍？

朱：朋友對我不忠都唔得啦，為乜事出賣我先？如果係善意嘅出賣梗係唔緊要啦，朋友係咁，更何況親密伴侶？如果男朋友出賣你，擺明要傷害你啦，咁何必再糾纏？

男友唔窮 相伴「中」老

記：你哋相戀11年，點解仲唔結婚？

朱：忙囉，或者因為我哋冇結婚，所以感情先至咁好，哈哈，依家我哋仲有拍拖嘅感覺，阿Paul真係好抵錫，佢冇呢啲花邊新聞，我都冇，我會避開呢啲唔開心嘅新聞，你錫一個人會關注佢嘅感受。

記：咁多年嚟，你哋感情有冇暗湧？

朱：冇，我睇唔到其他人，係有人「挑情」我（網劇《男女字典》中對白），公開承認對我有好感，問我做乜唔結婚咁囉，梗會有呢啲咁黐線嘅人，係咩人就唔好講啦，佢真係打得少，我會小心啲。

記：係咪已認定阿Paul係終身伴侶？

朱：除咗我家人，好close嘅朋友外，佢係最了解我嘅人，冇法，佢太明白我，除咗噓寒問暖外，有時我個心諗緊乜，出發點係點，佢諗到、了解到，佢信任我。佢係我知己，佢欣賞我嘅內心，我欣賞佢嘅身材，佢睇到我嘅靈魂。喺呢11年都有人追我，不過我覺得佢哋係搞搞震居多。

記：阿Paul畀人話佢窮？

朱：真係慘，佢對我好坦白，所有錢都畀我知，佢每個job我都知，佢唔會偷偷摸摸唔出聲。話佢寄居喺我九龍城屋企，只因佢band房喺土瓜灣，同我屋企好近，我哋唔係成日見到面，佢過嚟探我咋。講樓多，佢層數都多過我啦，佢元朗嗰度係村屋，係一幢，佢絕對唔窮，只係佢講畀人哋聽話拎晒啲老婆本出嚟做嘢，啲人先誤解啫，我哋係自食其力，經濟獨立，不過同佢出街，梗係佢畀錢啦。

靚靚所託 「智」在必得

記：你同Chilam拍電視劇《射鵰英雄傳》時，又傳過緋聞？

朱：好笑囉，例牌咁，其實我哋合作過好多次，又拍過一齣電影叫《驚天大逃亡》，我哋又係男、女主角，又合作拍電視劇《如來神掌》，我梗係唔係同佢啦，大家只係差唔多年紀啫。

記：傳袁詠儀（靚靚）睇實Chilam，所以你哋無疾而終？

朱：靚靚反而叫我幫佢瞄住佢老公添呀（大笑），我同Chilam拍《如來神掌》時，靚靚嚟探班，佢叫我幫佢瞄實，我覺得靚靚咁做係應該嘅，佢做法冇錯，如果你愛一個人，好多嘢都做得出。

猛獻殷勤 「城」勢出擊

記：喺95年，因為擔任郭富城音樂特輯時傳撻着，究竟係唔係真？

朱：緋聞好似做娛樂圈嘅必經階段咁，依家我識避開，最初大家都會有好多幻想，同唔同嘅人合作，有唔同情況嘅撻着，先有咁嘅講法。

記：有傳係你介入郭富城同鍾麗緹之間？

朱：真係陰功，關我鬼事呀？不過我明白新聞界朋友咁寫會比較有遐想。我都喺北京撞見過鍾麗緹，大家有傾偈，我係從來、絕對唔會介入人哋嘅感情世界，我好憎，如果我介入得人哋，咁呢個男朋友又受嘅，呢個人都唔使恨喇，所以第三者嘅關係一定唔會長久。

記：睇報道話你同城城喺之前一個慈善賽車同場，城城仲對你好殷勤，嗰次係咪傳緋聞後第一次碰面？

朱：偶然都見到，除非我離開呢個圈啫，大家梗有傾偈，但傾乜我唔記得喇，我冇刻意去記，我好怕緋聞，因為我唔想影響到人哋、仲有我同男友（黃貫中），唔想有奇怪嘅新聞搞到佢，我feel到佢會唔鍾意。

文：音樂組

攝：沈健程

場地：馬可孛羅香港酒店海景套房

化妝：JONATHAN LI@MOD

髮型：Hair Styling@II Colpo