阿倫唔怕賴嘢幫得就幫
樂壇校長譚詠麟（阿倫）前晚率領關楚耀、Mr.、謝安琪及最新加盟的林子祥（Lam）為Youtube Music Day Live音樂會於九展演出，對於近日DJ李志剛笑嘲阿倫所幫過的人都「賴嘢」，暗寸關楚耀及Mr.主音Alan的負面新聞，阿倫從容回應說：「唔係，溫拿同李克勤都幾好呀，賴過嘢唔驚，公司賴番咪得囉，助人為快樂之本嘛！」隨後他於後台捉住後輩逐一當眾訓話一番，他吩咐完關楚耀「賴完嘢唔好再賴」後，又扯住Alan件衫說：「幫人係啱，不過都要睇情況，冇理由爆樽都唔走呀？」
另外，身為前輩的阿Lam笑言要做「新生」向校長報到，他說：「佢冇訓我話喎，好錫住我，我係Form 1仔，大佢少少，佢25歲，我頂多大佢三年！」
