王菲回歸騷群星搶飛

「王菲巡唱2010」首站將於下周五假北京舉行，綵排工作進行得如火如荼，昨日經理人陳家瑛在微博上載了綵排相，阿菲一手揸咪一手玩iPhone，寓工作於娛樂；另大陸女主播柳岩上載了王菲舞台搭台情況，並且留言：「現場正在布置頂部的星星燈，據介紹都是超級高規格的硬件。」

陳偉霆阿Sa捧場

王菲演唱會一票難求，同樣將開騷的GiGi和G.E.M.都想乘機取經，GiGi說：「佢把聲靚到好似天籟之音，每次演唱會都有驚喜，自己想乘機取經。聽講佢每次去唱K必點唱我嗰首《膽小鬼》，真係好開心。」明年在紅館開騷的G.E.M.則說：「撞正自己出新碟可能去唔到睇，我好鍾意佢嘅歌，聽講佢好有型格，話唔安哥就唔安哥，真係好想睇佢演唱會取經。」

撲唔到飛的謝安琪奢望有人出讓門票：「王菲係集體回憶。」同樣撲唔到飛的陳偉霆說：「希望佢喺香港開，三、四千蚊張飛都值回票價。（同蔡卓妍一齊睇？）夾到期都會。」至於張敬軒和王菀之（Ivana）就一早搵唱片公司撲飛，怎知因工作撞期去唔到，覺得好可惜。

梁詠琪讚阿菲是天籟之音。

G.E.M.最欣賞王菲有型格。

衞蘭搵黎明搞掂

不過，剛開完騷的衞蘭竟忙到不知王菲復出，惘然說：「唔知喎，好有興趣睇，我知王菲同黎明熟，睇吓搵黎明撲唔撲到飛！」雷頌德同樣懵然不知：「佢幾時開騷呀？幾時可以買飛？（賣晒，咁大懵！）可能老婆生BB乜都唔知。」

文：音樂組